Наурыз мерекесі қарсаңында «Самұрық-Қазына» АҚ компаниялар тобы тарапынан Абай атындағы облыстық әмбебап кітапханада заманауи қоғамдық кеңістік салтанатты түрде ашылып, Семей қаласының зағип және нашар көретін азаматтарға арналған кітапханасына арнайы техникалық құрал-жабдықтар табысталды.

Бұл қадамдар «Абай облысының кітапханаларын жаңғырту» жобасы аясында бас демеуші, «Самұрық-Қазына» АҚ компаниялар тобының бірыңғай қайырымдылық операторы – «Samruk-Kazyna Trust» қорының «Кемелді қадам» қоғамдық қорымен серіктестігі арқылы жүзеге асты. 

Заманауи кітапханалар оның материалдық-техникалық жай-күйі, коворкинг аймақтарының қызметі халық сұранысына сәйкес болуы қажет. Сондықтан, жобаның негізгі мақсаты – білім берудің заманауи интерактивті және коммуникативті түрлерін құру арқылы оқырмандардың зияткерлік демалысқа деген қызығушылығын арттыру. 

«Қазақ халқына Абай Құнанбайұлы, Шәкәрім Құдайбердіұлы, Мұхтар Әуезов сынды ұлы тұлғаларды сыйлаған облысымыздың рухани өміріне қолдау көрсеткен «Самұрық-Қазына» АҚ басшылығына алғыс айтамыз. Жоба Абай облысы жастарының шығармашылық, рухани және мәдени әлеуетін одан әрі дамытуға көмектеседі деп сенеміз.Жас буын кітапханамен дос болып, әдебиет әлеміне әуестіктерін тудыру үшін,осындай шаралардың маңызы зор», - деді өз сөзінде Абай облысы әкімінің орынбасары Әділбек Мұсабаев.

Заманауи кітапханалардың материалдық-техникалық жай-күйі, коворкинг аймақтары халық сұранысына сәйкес болуы қажет. Сондықтан, жобаның негізгі мақсаты –  заманауи интерактивті және коммуникативті түрлерін пайдалану арқылы  жас оқырмандардың оқу-білімге деген қызығушылығын арттыру.

«Жоба аясында Семей қаласының екі кітапханасына қайырымдылық көмек көрсетілді. Абай атындағы облыстық әмбебап кітапханасында барлық қала тұрғындары үшін тегін балаларға арналған қоғамдық инновациялық робототехника зертханасы, коворкинг-оқу залы мен ойын-шығармашылық алаңы ашылды. Ал нашар көретін азаматтарға арналған кітапхана енді өз оқырмандарына бедерлі-нүктелі қаріппен кітап шығаруға, қызметтердің кеңейтілген ауқымын көрсетуге және басқа да жерлерде шаралар өткізуге қауқарлы», - деді «Кемелді қадам» ҚҚ төрайымы Гауһар Карменова.

Белгілі ақын, ҚР Мемлекеттік сыйлығының лауреаты, Жазушылар Одағының мүшесі, Т.Айбергенов атындағы сыйлықтың лауреаты Т.Әбдікәкімұлы : «Жақсы маман тәрбиелеу үшін, жақсы адам тәрбиелеу керек.Ол үшін бала жасынан кітапты көп оқуы керек. Көп оқыған адам, көп біледі.Сөздік қоры қалыптасады.Біз балаларымызды сауаттылыққа тәрбиелеуіміз қажет» дей келе, игі шараға мұрындық болған «Samruk-Kazyna Trust» қорына, «Кемелді қадам» қоғамдық қорының төрайымы Г.Карменоваға алғысын жеткізді.

Облыстық кітапханадағы «Samruk-Kazyna Trust» тарапынан 54,6 миллион теңге қарастырылған кеңістікте «Сиқырлы қылқалам», «Шебер қолдар», «Құм-арт терапиясы» сынды үйірмелерге қажетті үстел мен орындықтар, сурет салатын ыңғайлы мольберттер, құммен сурет салу үшін арнайы үстелдер, кітап сөрелері мен жұмсақ жиһаз сыйға тартылса, оқу залы-коворкинг арнайы кітап сөрелерімін, жиһазбен жабдықталып, оқу бағдарламасын жүзеге асыру үшін ноутбуктер, жас оқырмандарға шаралар өткізуде пайдалану үшін проектор қолданысқа берілді. Инновациялық робототехника зертханасы компьютерлермен, ноутбуктермен, проектормен, сканермен, 3D-принтер, робот, конструктор сынды робототехниканы үйренуге арналған жинақтармен, интерактивті үстелдермен қамтамасыз етілді. 

Бүгінде облыстық кітапхана ересек оқырмандарды есептемегенде, 2500-ден астам балаға қызмет көрсете алады.

«Кітапхананы жаңғырту нәтижесінде балалар мен жасөспірімдердің зияткерлік дамуына, олардың мәдени бос уақытын тиімді өткізуіне, шығармашылық жоспарлар мен креативті идеяларды жүзеге асыруына арналған жаңа тартымды кеңістіктер мен алаңдар пайда болды. Жаңа орта жас оқырмандардың өздігінен білім алуына, кітапқа, шығармашылыққа деген қызығушылықтарын арттыруға септігін тигізетіні анық», - деді облыстық Абай атындағы әмбебап кітапханасының директоры Мерей Қарт.

Бұған дейін көзі көрмейтін және нашар көретін азаматтарға арналған арнайы кітапхана бейімделген сипаттағы мамандандырылған кітаптардан қиналып келді. Қазақстанда ондай баспахана жоқ. Жоба арқылы кітапхана 17,4 млн теңгеге тактильді кітаптарды басып шығаруға арналған жабдықтар жиынтығымен, кеңсе техникасымен, жеке тыңдау жабдықтарымен, дыбыстық аппаратурамен және жиһазбен жабдықталды. Енді арнайы мекеме қазақ тілінде Брайль қарпімен кітаптар шығаруға қабілетті еліміздегі бірінші кітапхана болмақ.

“Бүгінгі Наурызнама онкүндігі аясында Қайырымдылық жасау игі шарасының куәсі болып отырғаныма қуаныштымын. Көру қабілеті бұзылған азаматтарға қамқорлық, кедергісіз орта құру - біздің қоғам алдындағы ортақ міндетіміз, мемлекеттің әлеуметтік саясатының маңызды бағыты. Арнайы кітапхананың кеңсе жабдықтары мен Брайль арнайы техникасымен жабдықталуы – оқырмандар үшін үлкен мүмкіндік. Игі бастамаға мұрындық болған «Samruk-Kazyna Trust» қорына және «Кемелді қадам» қоғамдық қорына алғыс білдіреміз” - деді Семей қаласының әкімі Нұрбол Нұрсағатов.

Арнайы кітапхана бүгінде 1000-ға жуық оқырманға қызмет көрсетеді. 

«Кітапханамызды жаңа заманауи жабдықтармен жаңартудың маңыздылығы өте зор. Брайль жүйесі бойынша құжаттарды (кітаптарды) шығаруға арналған жабдықтардың жиынтығы біз үшін ерекше құнды. Енді біз балаларға тактильді графикалық суреттермен көркемделген мемлекеттік тілдегі танымал балалар әдебиетін оқуға мүмкіндік жасай аламыз», - деді арнайы кітапхана директорының міндетін атқарушы Гүлнәр Гафиатуллина. 

Қайырымдылық жобасы аясында «Samruk-Kazyna Trust» қорының қаржылай қолдауымен 2024 жылдың соңына дейін, Семейде зағип және нашар көретін азаматтарға арналған тәуелсіз Қазақстандағы тұңғыш арнайы типтік кітапхананы салу жоспарлануда. Бұл осындай сипаттағы алғашқы және жалғыз мәдени мекеме болмақ.