Елімізде жол бойында намазханалар салынады

Қазақстанда автомобиль жолдарының бойында жолаушыларға арналған намазханалар салу жобасы қолға алынды. Бұл туралы ҚМДБ Уақып корпоративтік қайырымдылық қоры хабарлады, деп хабарлайды MadeniPortal.kz. 

Жоба «ҚазАвтоЖол» компаниясымен бірлесіп жүзеге асырылады. Намазханалар шалғай жол учаскелерінде орналасады. Олардың жанынан арнайы дәрет алу орындары да қарастырылады. Жобаның басты ерекшелігі – ғимараттар жыл бойы пайдалануға ыңғайлы етіп салынады. Атап айтқанда, қыста жылы, жазда салқын болады.

Бастаманың негізгі мақсаты – алыс сапарға шыққан жолаушыларға құлшылықтарын жайлы жағдайда орындауға мүмкіндік жасау. Сонымен қатар жол бойында тазалық пен қолайлылықты қамтамасыз ету көзделген. Жоба аясында намазханалардың нақты қай өңірлерде және қашан салынатыны әзірге жарияланған жоқ.

Жол бойында намаз оқуға арналған арнайы орындар әлемнің бірқатар елінде бар. Мұндай намазханалар ұзақ сапарға шыққан жолаушыларға құлшылық жасап, тынығып алуға мүмкіндік береді. 

Мәселен, Сауд Арабиясында Мекке мен Мәдинаға баратын жолдарда мешіттер мен намаз оқуға арналған орындар кездеседі. Бұл әсіресе қажылық пен умра сапарына шыққан мұсылмандар үшін маңызды.

Түркияда қалааралық тасжолдар бойындағы ірі демалыс кешендері мен жанармай құю бекеттерінде намазханалар жиі қарастырылған. Олар түрік тілінде mescit деп аталады.

Малайзияда тасжол бойындағы демалыс орындарында намазханалар арнайы қызмет түрі ретінде қарастырылған. Қызығы, 2025 жылы Срембан қаласы маңындағы жол бойындағы намазханада алғаш рет жұма намазын өткізуге ресми рұқсат берілді. Ал 2026 жылы осы жерде Ораза айт намазын ұйымдастыру бастамасы көтерілді.

Индонезияда да жол бойындағы намазханалар кең таралған. Мәселен, Транс-Ява ақылы тасжолының көптеген демалыс аймақтарында мешіт немесе шағын намазхана, жанармай бекеті, тамақтану орны мен дәретхана бірге орналасқан.

Сауд Арабиясында Мекке–Жидда және Мәдина бағытындағы жолдарда қажыларға арналған мешіттер бар. Олар кондиционер, ауызсу және тәулік бойы пайдалануға болатын санитарлық орындармен жабдықталған.

Бұл тәжірибе жол бойындағы намазханалардың тек құлшылық орны ғана емес, жолаушыларға қолайлы жағдай жасайтын инфрақұрылымның маңызды бөлігі екенін көрсетеді.