3,1 млрд теңге айналым, қымбат көліктер: Шымкентте онлайн-казино ұйымдастырғандар сотталды

Шымкентте заңсыз онлайн-казино ұйымдастырған екі адамға сот үкімі шықты. Қылмыстық іс бойынша заңсыз ойын бизнесінің ақша айналымы 3,1 млрд теңгеге жеткен, деп хабарлады MadeniPortal.kz.

Сотта екі адамның заңсыз онлайн-казино ұйымдастыруына қатысты қылмыстық іс қаралды.

Іс материалдарына сәйкес, заңсыз ойын бизнесінің жалпы ақша айналымы 3,1 млрд теңгені құраған. Сот қылмыстық іс бойынша екі адамға қатысты үкім шығарды.

Қаржылық мониторинг агенттігінің мәліметінше, күдіктілер «Bingo-37» және «Lotoboom» онлайн-платформалары арқылы заңсыз ойын бизнесін жүргізген. Олар WhatsApp мессенджері арқылы азаматтарға құмар ойындарға қатысу туралы ұсыныстар жіберген. Қызығушылық танытқан адамдарға арнайы аккаунт ашып, логин, құпиясөз және ақша аударуға арналған банк шоттарының деректемелерін берген. Ақша қабылдау және ұтыстарды төлеу үшін 14 дроппердің атына рәсімделген банк шоттары пайдаланылған.

Тергеу барысында ұйымдастырушылардың заңсыз табысқа 200 млн теңгеден астам мүлік сатып алғаны анықталды. Олардың қатарында BYD Destroyer, LiXiang L6 Max, Chevrolet Monza, SsangYong Rexton автокөліктері және екі жер учаскесі бар. Сот үкімімен екі адам төрт жылға бас бостандығынан айырылды. Қылмыстық жолмен алынған қаражатқа сатып алынған мүлік мемлекет кірісіне тәркіленді.

Қазіргі уақытта сот үкімі заңды күшіне енген жоқ.