89 жастағы зейнеткер бөтен әйелді жұбайы деп ойлап, соңынан еріп кеткен

Петропавлда полицейлер жоғалып кеткен 89 жастағы зейнеткерді тауып, үйіне аман-есен жеткізді. Ер адамды жұбайы дүкенге кіріп шыққан кезде жоғалғанын байқап, полицияға хабарласқан, деп хабарлайды MadeniPortal.kz.

Зейнеткердің жанында ұялы телефоны болмағандықтан, онымен өздігінен байланысу мүмкін болмады.

Оқиға орнына Петропавл қалалық полиция басқармасы патрульдік полиция батальоны ротасының командирі, полиция капитаны Қуаныш Сүлейменов келді. Ол зейнеткердің жұбайымен бірге жақын маңдағы аумақты қарап шыққанымен, ер адамды таба алмады.

Осыдан кейін полицей дүкендегі бейнебақылау камераларын тексеруге шешім қабылдады. Дүкен иесі қажетті бейнежазбаны ұсынды. Оның көмегімен зейнеткердің қай бағытта кеткенін анықтауға мүмкіндік туды.

Бейнежазбадан ер адамның көру қабілетінің нашарлағаны белгілі болды. Ол жұбайының киіміне ұқсас киім киген әйелді байқап, оны әйелі деп ойлап, соңынан ерген. Осылайша жолынан адасып кеткен.

Қуаныш Сүлейменов жедел басқару орталығымен байланысып, жоғалған адамның сыртқы белгілерін, нақты уақыт пен орналасқан жерін хабарлады. Бейнебақылау инспекторлары оның жүріп өткен бағытын бақылауға алды.

Көп ұзамай зейнеткер Жамбыл көшесіндегі көпқабатты үйлердің бірінің кіреберісінен табылды. Полиция капитаны Сүлейменов оны жұбайымен бірге үйіне аман-есен жеткізді.

Полиция қызметкерлері қарт адамдардың қауіпсіздігіне алдын ала көңіл бөлуге шақырады. Мүмкіндігінше егде жастағы адамдарға үйден байланыс құралынсыз шықпау ұсынылады.

Егер адамның есте сақтау қабілетінде қиындықтар болса және ол өзінің аты-жөнін немесе үй мекенжайын ұмытып қалуы мүмкін болса, полицейлер қалтасына қажетті мәліметтер мен туыстарының телефон нөмірлері жазылған қағаз салып қоюға кеңес береді.

Мұндай қарапайым шара қарт адам жоғалған жағдайда іздеу жұмыстарын айтарлықтай жеделдетіп, оның қайда тұратынын немесе туыстарымен қалай байланысуға болатынын анықтауға көмектеседі.

Полиция сондай-ақ туысыңыз жоғалып кеткен жағдайда күтпей, дереу құқық қорғау органдарына жүгінуге шақырады. Іздеу жұмыстары неғұрлым ерте басталса, адамды қысқа мерзімде табу мүмкіндігі соғұрлым жоғары болады.