Алматыда егіз босанған әйел ауруханада көз жұмды

Алматы облысында егіз босанған әйел ауруханада көз жұмды. 40 жастағы Қарлығаш жүктіліктің сегізінші айына жақындағанда перзенттерін кесір тілігімен дүниеге әкелген. Ота сәтті өткенімен, артынша ананың жағдайы күрт нашарлап, аз уақыт ішінде жан тапсырыпты. Марқұмның жақындары болған жағдайға дәрігерлерді айыптайды. Ал, ақ халаттылар «еш кінәміз жоқ» деп отыр, деп хабарлайды MadeniPortal.kz bairaqmedia.kz сілтеме жасап.

Егізін өмірге әкеліп, өзі ажал құшқан Қарлығаш Отарбаеваның денесі жер қойнына тапсырылды. Туыстары, «сап-сау жүрген жан еді» деп, оның өліміне сене алар емес. 13 жыл күткен қыздарын құша алмаған ананың қазасына көк аспан да қосылып жылағандай. Қара жамылғандар болған жайтқа дәрігерлерді айыптайды.

Марқұм дәл 40 жасқа толған күнінде көз жұмған. Оған дейін отаның сәтті өткенін телефон арқылы айтып, жақындарын қуантыпты.

Қайғылы оқиға Алматы көпсалалы клиникалық ауруханасында болған. Мұндағы дәрігерлер марқұмның ауыр жағдайда жеткізілгенін айтып отыр. Сөздеріне сенсек, келіншектің өліміне аяқ асты жүрегінің тоқтауы себеп болған.

Қарлығаштың артында үш қызы жетім қалды. Ал жаңа туған нәрестелер, сол анасы жан тапсырған ауруханада екен. Жағдайы қалыпты дейді дәрігерлер. Қазір іс бойынша тергеу басталған. Марқұмның отбасы оның өліміне себеп болғандар тиісті жазасын алса дейді.