«Ақ халаттылардың бәрі періште емес»: Денсаулық сақтау министрі үн қатты

Ақтауда баланың әкесі мен хирург арасында болған жанжал қоғамда қызу талқыланып жатыр. Бір тарап дәрігерге қол көтеруді қатаң жазалау керек десе, енді бірі ақ халаттылардың да жауапкершілігі назардан тыс қалмауы тиіс екенін айтуда. Осы мәселеге қатысты Денсаулық сақтау министрі Ақмарал Әлназарова пікір білдірді, деп хабарлайды MadeniPortal.kz.

Журналист министрден дәрігерлерді қорғауға бағытталған заң ата-аналардың құқығын шектеп қоймай ма деп сұрады. Өйткені қоғамда хирургпен жанжалдасқан баланың әкесін жақтап, оның мұндай әрекетке баруына не себеп болғанын анықтауды талап етіп жатқандар да бар.

Бұған жауап берген Ақмарал Әлназарова қызметтік міндетін атқарып жүрген медицина қызметкеріне күш қолдануды ақтауға болмайтынын жеткізді.

Алайда журналист баланың әкесінің ұстанымын да назарға салды. Оның айтуынша, ер адам жанжалға дәрігердің әрекеті себеп болғанын алға тартады. Осы тұста медицина қызметкерлерін заңмен қорғау олардың өз міндетіне салғырт қарауына жол ашпай ма деген мәселе көтерілді.

Министр бұл оқиғаға құқық қорғау органдары баға беретінін айтып, медицина қызметкерлеріне күш қолданғаны үшін жауапкершіліктің күшейтілгенін еске салды.

Министрдің сөзінше, денсаулық сақтау саласының басты міндеті – халыққа сапалы медициналық қызмет көрсету. Ал баланың әкесінің мұндай әрекетке не себепті барғаны тергеу барысында анықталуға тиіс.

Журналист өз кезегінде заң дәрігерді қорғағанымен, медициналық көмектің сапасына көңілі толмаған ата-ананың құқығы қалай қорғалатынын қайта сұрады.

Бұған министр әзірге дәрігердің әрекеті жанжалға себеп болғанын растайтын дәлел жоқ екенін айтты.

Осылайша, Ақтаудағы оқиға медицина қызметкерлерінің қауіпсіздігімен қатар, пациенттер мен олардың жақындарының құқығын қорғау мәселесін де қайта көтерді.

Әзірге жанжалдың нақты неден басталғаны және оған қатысушылардың әрекетіне қандай құқықтық баға берілетіні тергеу қорытындысынан кейін белгілі болады.