Көктемде суға кеткен 8 жастағы баланың анасы жүрек тебірентерлік жазба жариялады

Түркістан облысы Келес ауданында көктемде суға ағып кеткен 8 жастағы Жаннұрдың анасы әлеуметтік желіде ұлын әлі күнге дейін күтіп жүргенін жазды. Баласының жоғалғанына жеті айдан асса да, анасы оның аман оралатынынан үміт үзбеген, деп хабарлайды MadeniPortal.kz. 

Жаннұрдың анасы әлеуметтік желідегі жазбасында ұлын жоғалтқаннан кейінгі ауыр күндері мен жан дүниесіндегі толғанысын бөлісті. Оның айтуынша, баласының тағдыры белгісіз күйде өмір сүру күн өткен сайын қиындай түскен.

Еске салайық, оқиға 2026 жылғы 23 наурызда Түркістан облысы Келес ауданына қарасты Абай ауылында болған.

Екінші сыныпта оқитын 8 жастағы Жаннұр арыққа түсіп кеткен аяқ киімін алмақ болған. Алайда суға түскен сәтте тайып құлап, қатты ағыс баланы Келес өзеніне қарай алып кеткен.

Оқиғадан кейін баланы іздеуге құтқарушылар, сүңгуірлер мен еріктілер жұмылдырылды. Іздестіру жұмыстарына дрондар да пайдаланылды. Мамандар өзен бойы мен оған жақын аумақтарды ұзақ уақыт тексергенімен, Жаннұрды табу мүмкін болмады. Кейін ресми іздестіру жұмыстары тоқтатылған. 

Анасы баласының тағдыры әлі белгісіз екенін айтып, бір күні үйіне оралар деген сеніммен өмір сүріп жүргенін жеткізді.

Жазба әлеуметтік желі қолданушыларының да жүрегін елжіретті. Көпшілік баласын күткен анаға қолдау білдіріп, сабыр мен күш-қуат тіледі.