Дәрігерлер қазақстандық әйелден салмағы 6 келіден асатын ісікті алып тастады

Семей қаласындағы Ядролық медицина және онкология орталығында күрделі хирургиялық операция жасалып, оның нәтижесін дәрігерлер клиникалық тұрғыдан маңызды әрі үлгілік деп бағалады. 47 жастағы науқастан диаметрі 31 сантиметр, салмағы 6 килограмнан асатын ісік алынып тасталды, деп хабарладыMadeniPortal.kz.

Дәрігерлердің мәліметінше, науқас бірнеше жыл бойы профилактикалық тексерулерден өтпеген, себебі айқын шағымдары болмаған. Алғашқы алаңдатарлық белгілер тек осы жылдың ақпан айында пайда болып, әйел «пневмония» диагнозымен емханаға жүгінген. Тексеру барысында дәрігерлер құрсақ қуысында ірі түзілісті анықтап, науқасты әрі қарай тексеру мен емдеу үшін Ядролық медицина және онкология орталығына жолдаған. Орталыққа түскен кезде әйел ішінің үлкейгенін және тәбетінің төмендегенін байқаған.

Операцияны мамандар тобы жүргізді: маммология және гинекология бөлімінің аға ординаторы Әсем Чалдыбаева негізгі хирург болды, оған осы бөлімнің дәрігері Зауре Кенжекова ассистенттік етті. Анестезиологиялық қамтамасыз етуді реаниматолог-дәрігер Бауыржан Никомбаев жүзеге асырды.

Операциядан кейін әйелдің жағдайы тұрақты, өміріне қауіп жоқ. Қазіргі уақытта ол дәрігерлердің бақылауында болып, оңалту кезеңінен өтуде.