Әр отбасына 25 млн теңгеден: кәсіпкерлер қаза тапқан сарбаздардың жақындарына көмек береді

Каспий теңізіндегі әскери оқу-жаттығу кезінде қаза тапқан әскери қызметшілердің отбасыларына қазақстандық кәсіпкерлер мен қоғам өкілдері қаржылай қолдау көрсететінін мәлімдеді. Қазірдің өзінде бірнеше азамат ондаған миллион теңге көлемінде көмек беруге дайын екенін жеткізді, деп хабарлады MadeniPortal.kz.

Қазақстан Халық Кеңесінің мүшесі, спорт қауымдастығының өкілі Гаджи Гаджиев қаза тапқан әскери қызметшілердің отбасыларына 100 млн теңге көлемінде материалдық көмек көрсететінін мәлімдеді.

Кәсіпкер Шахмұрат Мүтәліп те сарбаздардың жақындарына қолдау білдірді. Ол өзіне тиесілі Integra Construction KZ компаниясы әрбір қаза тапқан әскери қызметшінің отбасына 25 млн теңгеден бөлетінінайтты.

Қаза тапқандардың отбасыларына Қазақстан Халық Кеңесінің мүшесі, бизнесмен Жұмабек Жанықұлов та қаржылай көмек көрсететінін жеткізді. Ол жеке өз атынан 50 млн теңге бөлуге дайын екенін мәлімдеді.

Осылайша, кәсіпкерлер жариялаған көмектің көлемі жүздеген миллион теңгеге жетуі мүмкін. Әсіресе әр қаза тапқан әскери қызметшінің отбасына 25 млн теңгеден бөлу туралы бастама жалпы соманы едәуір арттырады.

Еске салайық, Каспийдегі қайғылы оқиғаға байланысты 25 қыркүйек Қазақстанда жалпыұлттық аза тұту күні болып жарияланды. Елде қаза тапқан әскери қызметшілерді еске алып, олардың отбасылары мен жақындарына көңіл айтылып жатыр.