Астана әкімі LRT іске қосу мерзімін нақтылады

Астана әкімі Жеңіс Қасымбек елордадағы жеңіл рельсті көлік (LRT) алдағы апталарда іске қосылуы мүмкін екенін мәлімдеді, деп хабарлады MadeniPortal.kz.

Бұл туралы Tengrinews.kz жазды.

Жеңіс Қасымбек ресми ашылу күні әзірге нақты белгіленбегенін айтты. Сонымен қатар іске қосу алдында шағын пресс-тур өткізу жоспарланып отыр.
«Біз 2–3 апта ішінде іске қоса аламыз деп үміттенеміз», — деді әкім.

Жеңіс Қасымбектің айтуынша, LRT-ның барлық сынақтары сәтті өткен. «Қазір барлық 18 пойыз желіге шығып тұр. Интервал аз — 3,5 минут. Жылдамдығы жоғары, кез келген басқа көлік түріне қарағанда 2 есе жылдам», — деді ол.

Әкім негізгі стансалардың дайын екенін де атап өтті. Олардың қатарында «Абу-Даби Плаза», «Ботаникалық бақ», «Астана Арена», Mega, «Әуежай» және жаңа вокзал бар.

Стансалар маңындағы аумақтарды абаттандыру жұмыстары жалғасып жатыр. Қасымбектің сөзінше, жаздың соңына дейін желі бойындағы аумақ толық ретке келтіріліп, асфальт төсеу аяқталып, жаяу жүргіншілерге ыңғайлы қатынас қамтамасыз етіледі.

Әкім сондай-ақ тұрғындардың LRT-ны қыста пайдалануына қатысты алаңдаушылықтарына және инфрақұрылым бойынша ескертулеріне жауап берді. Оның айтуынша, өткен қыста қар арнайы техникасыз тазартылғанымен, жүйе қалыпты режимде жұмыс істеген. Қазір мұндай техника жеткізіліп жатыр және келесі қыс маусымына толық дайын болады.

Судың жиналуы мен кейбір учаскелердегі бояудың жарылуына қатысты сын-пікірлерге жауап бере отырып, Қасымбек нөсер кәріз жүйесі енді ғана толық қосылып жатқанын, ал кейбір элементтерді бояу жұмыстарын жылы кезеңде аяқтау шешілгенін айтты.

Астанада LRT-ның сынақтық пайдалануы 2025 жылғы 29 қыркүйекте басталған.