Атырау облысында жоғалып кеткен отбасы: полиция тәулік бойы жұмыс істеп жатыр

Атырау облысы Қызылқоға ауданына қарасты Жангелдин ауылында 2025 жылғы 25 желтоқсанда тіркелген бір отбасының төрт мүшесінің із-түссіз жоғалып кету дерегі бойынша қозғалған қылмыстық іс бойынша тергеу жалғасып жатыр, деп хабарлады MadeniPortal.kz.

Өңірдің бас полицейі, полиция генерал-майоры Онал Бекиев жедел кеңес өткізіп, онда тергеудің барысы мен құқық қорғаушылардың алдағы қадамдары талқыланды.

“Кеңес барысында жүргізіліп жатқан жедел-іздестіру шараларының нәтижелері тыңдалып, тергеудің келесі кезеңіндегі негізгі бағыттар айқындалды. Іздеу жұмыстарына тартылған жедел топтардың ведомствоаралық және ішкі қызметтік өзара іс-қимыл мәселелеріне, сондай-ақ күш пен құралды ұтымды пайдалануға ерекше назар аударылды. Департамент басшысы қылмыстық істі заң талаптарына қатаң сай жан-жақты, объективті тергеуді қамтамасыз етуді тапсырып, келіп түсетін әрбір жедел ақпаратты мұқият әрі уақытылы тексеру қажеттігін атап өтті”, – деп хабарлайды полицияның баспасөз қызметі.

Қазіргі таңда бұл қылмыстық іс Атырау облысы полиция департаментінің ерекше бақылауында. Жедел-іздестіру және тергеу шаралары тәулік бойы жалғасуда.

Еске салсақ, бір айдан астам уақыт бұрын өңірдің төрт тұрғыны із-түссіз жоғалып кеткен. 25 желтоқсанда Атырау қаласының тұрғыны полицияға жүгініп, ағасының отбасымен бірге ұзақ уақыт бойы байланысқа шықпай жүргенін хабарлаған. Жоғалғандар – Қызылқоға ауданы Жангелдин ауылының тұрғындары. Қараша айында олар үйлерінен белгісіз бағытқа кетіп, әлі күнге дейін оралмаған. Іздеуде жүргендер қатарында ерлі-зайыптылар және жасы 33 пен 35-тегі екі ересек баласы бар.

Жоғалғандардың ұялы телефондары Қазақстан аумағында бірде қосылып, бірде өшіп отырған, соңғы рет Шымкентте тіркелген.

Қайтыс болғандардың қызы және оның күйеуі – яғни марқұмдардың күйеу баласы мен оның жұбайының қайда екені белгісіз. Ерлі-зайыпты бес баласын әжесіне қалдырып кеткен.

Іздеуде жүрген күйеу бала – Сұлтан Сәрсемалиев туралы ақпарат Бас прокуратураның Құқықтық статистика және арнайы есепке алу органдары порталына жарияланған. Іздестіру ісі 2026 жылғы 8 қаңтарда тіркелген.

Қаза тапқандардың туыстары 66 жастағы Мақсот Мұқанғалиев пен оның жұбайы қайтыс болғаннан кейін де дауыс хабарламаларын алғандарын айтқан. Жақындарының сөзінше, хабарламалар келінінің телефонынан келген, алайда болжам бойынша, ол кезде әйелдің өзі де өлтірілген болуы мүмкін, ал әлдекім бұрын жазылып қойған аудиохабарламаларды қайта жіберіп отырған.