Балаларды қорқытып сүйісуге мәжбүрлеген: Степногорскіде 16 жастағы жасөспірімдер тексеріліп жатыр (ВИДЕО)

Ақмола облысының Степногорск қаласында 16 жастағы екі жасөспірім өздерінен кіші балаларды қорқытып, бір-бірін сүйуге мәжбүрлеген. Оқиғаға байланысты полиция тексеру жүргізіп жатыр, деп хабарлады MadeniPortal.kz.

31-арнаның «Информбюро» бағдарламасының мәліметінше, жасөспірімдер балаларды бұталардың арасына апарып, мазақ етіп, қысым көрсеткен. Сондай-ақ болған жайтты телефонға түсіріп, әлеуметтік желіде тікелей эфир жүргізгені айтылды.

Оқиға туралы Степногорск тұрғындары мен ата-аналар әлеуметтік желіде жазған. Полиция аталған дерек бойынша тексеру басталғанын растады.

Мамандардың айтуынша, балалар арасындағы буллингтің едәуір бөлігі құқық қорғау органдарына дейін жетпей қалады. Психолог Татьяна Любчанская қазіргі кезде әлімжеттіктің әлеуметтік желілерге де ауысқанын атап өтті. Көп жағдайда ата-аналар баласының буллингке ұшырағанын физикалық немесе психологиялық зардап келгеннен кейін ғана біледі.

Оқу-ағарту министрлігінің мәліметінше, мектептер мен колледждерде «ДосболLIKE» буллингке қарсы бағдарламасы жұмыс істейді. Ведомство өкілдері білім беру ортасында өзін қауіпсіз сезінетін оқушылар үлесі 2%-ға артқанын, ал әлеуметтік оқшаулану мен елемеу көрсеткіші 1,5%-ға төмендегенін мәлімдеді.

Ал мамандар буллингпен күресте тек жазалау жеткіліксіз екенін айтады. Олардың пікірінше, жәбірленушімен қатар қысым көрсеткен балалармен және оқиғаны сырттай бақылап, үнсіз қалғандармен де жүйелі жұмыс жүргізілуі қажет.