Балаларға бөлек SIM-карта: Қазақстанда жаңа тәртіп кеңейтіледі

Президент Қасым-Жомарт Тоқаев балаларды интернеттегі зиянды контенттен қорғау үшін міндетті балалар SIM-карталарын енгізу ауқымын кеңейтуді тапсырды, деп хабарлады MadeniPortal.kz.

Бұл туралы Мемлекет басшысы Республикалық тамыз конференциясында айтты.

Президенттің сөзінше, бүгінде балалардың дүниетанымына отбасы мен мектептен бөлек, әлеуметтік желілер, цифрлық платформалар және агрессивті жарнама да айтарлықтай әсер етіп отыр. Сондықтан олардың интернет кеңістігіндегі қауіпсіздігін тек ата-аналардың жауапкершілігіне қалдыру жеткіліксіз.

Мемлекет басшысы балалар денсаулығына әсер ететін фастфуд жарнамасына да назар аударды. Оның мәліметінше, Қазақстанда 7 мыңға жуық бала қант диабетімен ауырады. Осыған байланысты Үкіметке мәселені жан-жақты зерттеп, тиісті шаралар қабылдау тапсырылды.

Сонымен қатар Президент мектеп оқулықтарындағы тарихи деректердің дұрыстығын қайта қарау қажеттігін айтты. Оның сөзінше, балаларға нақты білімнің орнына мифтер мен жалған қаһармандар туралы түсінік беруге жол бермеу керек.

Тоқаев мектепте 18 жасқа дейін оқыту тәжірибесінің қаншалықты негізді екеніне де күмән келтіріп, Оқу-ағарту министрлігіне мәселені зерттеп, ұсыныс енгізуді тапсырды. Президент білім саласында реформа үшін реформа жасауға болмайтынын және өзгерістер мұғалімдерге қосымша күйзеліс әкелмеуі керектігін атап өтті.

Соңғы бес жылда Қазақстанда бір миллион оқушы орнына есептелген мыңнан астам мектеп салынған.