Итальяндық сәнгер Джорджо Армани өмірден өтті

92 жасында итальяндық сәнгер әрі кәсіпкер, Armani компаниясының негізін қалаушы Джорджо Армани өмірден өтті, деп хабарлады Мadeniportal.kz.

"Милан, 2025 жылғы 4 қыркүйек – Шексіз қайғымен Armani тобы өзінің негізін қалаушысы, шабыт берушісі және қажырлы жетекшісі – Джорджо Арманидің өмірден өткенін хабарлайды.

Синьор Армани, – деп қызметкерлері мен әріптестері әрдайым құрметпен және сүйіспеншілікпен атағандай, – жақындарының ортасында тыныш түрде көз жұмды. Ол соңғы күндеріне дейін тыным таппай жұмыс істеп, компанияға, топтамаларға және қазіргі мен болашақ жобаларға өзін арнады.

Джорджо Армани жылдар бойы сәннен бастап өмірдің әр қырын қамтыған кең көзқарас қалыптастырды. Ол заман ағымын ерекше айқындықпен және прагматизммен болжай білді. Адамдарға және қазіргі уақытқа деген шексіз қызығушылығы оның басты қозғаушы күші болды. Осы жолда ол көпшілікпен ашық диалог орнатып, әр адаммен байланыс орната білетін сүйікті әрі құрметті тұлғаға айналды. Қоғамның қажеттіліктеріне әрдайым бей-жай қарамай, әсіресе өзі жақсы көретін Милан қаласын қолдауға белсенді қатысты.

Giorgio Armani – жарты ғасырлық тарихы бар компания, ол сезім мен сабыр арқылы құрылды. Джорджо Армани әрқашан ой еркіндігін де, әрекет еркіндігін де басты құндылық санады. Бүгінде де, болашақта да компания осы рухтың бейнесі болып қала береді. Оның отбасы мен қызметкерлері бұл құндылықтарды сақтап, топтың жұмысын жалғастырады.

Қоштасу рәсімі 6 қыркүйек сенбі мен 7 қыркүйек жексенбі аралығында, таңғы 9-дан кешкі 6-ға дейін Миланда, Via Bergognone 59 мекенжайындағы Armani/Teatro ғимаратында өтеді. Синьор Арманидің нақты тілегі бойынша жерлеу рәсімі жеке түрде ұйымдастырылады", - делінген ресми парақшада.