«Күн сайын балалар өледі»: Қостанайлық тұрғын дәрігерлердің жауапсыздығын сынға алды

Қостанай тұрғыны перинаталдық орталық дәрігерлерін жаңа туған нәрестесінің өліміне кінәлап отыр, деп хабарлады Мadeniportal.kz Stan.kz ақпарат агенттігіне сілтеме жасап.

Әсел Уақбаева екі апта бойы ауруханада жатып, тек қызынан емес, бала көтеру мүмкіндігінен де айырылды. Әйелдің айтуынша, босану кезінде дәрігерлер оның кесарь тілігін жасау туралы өтінішіне құлақ аспай, ұзақ уақыт мүлдем шара қолданбаған.

35 жастағы Әсел Уақбаева бірнеше күн бұрын перинаталдық орталықтан шықты. Дәрігерлер оған енді ешқашан ана бола алмайтынын айтқан. Әйелдің сөзінше, 4 наурыз күні, жүктілігінің 35-аптасында, оның суы кетіп, ауруханаға түскен. Ол кесарь тілігін жасауды сұраған, бірақ дәрігерлер хаттамаларға сүйене отырып, бас тартқан. Бір күн өткен соң қатты толғақ басталып, артынша қан кету пайда болған. Тек сол кезде ғана дәрігерлер оны операцияға алуды шешкен.

Әселге жатырын алып тастағанын 8 күннен кейін ғана хабарлаған. Бұл жаңалық оны қатты шошытып, әділдікке жетуге бел буды. Әйел өзінің адвокаты Алмат Рсалинмен бірге полиция департаменті мен медициналық бақылау басқармасына арыз түсірген.

Перинаталдық орталықтың хабарлауынша, алдын ала медициналық картаны тексеру кезінде босану уақытында бала жолдасының жедел ажырап кетуі салдарынан қан кету пайда болған. Бұл нәрестенің жатыр ішінде шетінеуіне алып келген. Дәрігерлер қан кетуді тоқтату үшін қарқынды ем жүргізіп, пациенттің өмірін сақтап қалуға тырысқан.

Қостанай облыстық ауруханасы перинаталдық орталығының акушерлік-гинекологиялық көмек жөніндегі бас дәрігерінің орынбасары Борис Аутеновтың айтуынша, қазір қызметтік тексеру басталған. 

Әселдің айтуынша, ол көптен күткен қызын өмірге әкелуі керек болған. Бұл – оның отбасындағы екінші бала. Қазір ол мәйітхана сараптамасының қорытындысын және қызметтік тексерудің нәтижелерін күтіп отыр.