Мыңнан астам рейс тоқтады: Астана әуежайы миллиардтаған шығынға батты

Астана халықаралық әуежайы 2025 жылдың қорытындысы бойынша 6,9 млрд теңге шығынға ұшырады. Өткен жылдың соңында кәсіпорынның жабылмаған шығыны 36 млрд теңгеге жеткен, деп хабарлайды MadeniPortal.kz.

Бұл туралы Kazinform жазды.

Әуежайдың 2025 жылғы жалпы жиынтық табысы 4 млрд теңгені құрады. Қаржылық жағдайға байланысты кәсіпорын тарифтерді қайта қарау, операциялық тиімділікті арттыру және ішкі резервтерді пайдалану бағыттарын қамтитын дағдарысқа қарсы бағдарламаны жүзеге асырып жатыр.

2026 жылдың алғашқы жартыжылдығындағы көрсеткіштерге ұшу-қону жолағын жөндеу, авиациялық керосин бағасының қымбаттауы және Таяу Шығыстағы жағдайға байланысты халықаралық рейстердің тоқтатылуы әсер еткен. Жалпы 1,1 мыңға жуық рейс орындалмай қалған.

Соған қарамастан, жолаушылар ағыны өскен. 2026 жылдың қаңтар–шілде айларында әуежай 5,4 млн жолаушығақызмет көрсетті. Бұл өткен жылдың сәйкес кезеңімен салыстырғанда 1,3%-ға көп.

Жүк және пошта тасымалы да айтарлықтай артқан. Жеті айда 8,9 мың тонна жүк пен пошта өңделіп, өсім 20%-дан асты. Ал авиациялық емес кірістер бірінші жартыжылдықта 24%-ға өсіп, 7,2 млрд теңгеге жетті.

Жыл соңына дейін Астана әкімдігі мен әуежай басшылығы тарифтік саясатты қайта қарап, шығындарды азайтып, коммерциялық бағыттарды дамытуға ниетті. Кәсіпорын қабылданған шаралар әуежайды біртіндеп шығынсыз жұмыс істеу деңгейіне шығаруға мүмкіндік береді деп күтеді.