Назарбаев, Путин, Мұхамедиұлы: сотқа тартылған бұрынғы мәдениет және спорт вице-министрі куәлік берді

Қожағапанов былтыр наурыз айында ұсталған. Ал бұл іс бойынша бірге жауапқа тартылып отырған тағы бір тұлға – SUCCESS K стратегиялық коммуникациялар агенттігінің бас директоры Ләззат Көккөзова.

Бұрынғы шенеунікке қылмыстық кодексінің 361-бабы («ауыр зардаптарға әкеп соқтырған қызметтік өкілеттіктерді теріс пайдалану») бойынша айып тағылса, Көккөзова 189-бап («өзіне сеніп тапсырылған бөтен мүлікті иемдену немесе талан-таражға салу, аса ірі мөлшерде») бойынша жауапқа тартылып отыр.

Антикордың мәліметінше, Қожағапанов 2018 жылы Петропавлда өткен Қазақстан мен Ресейдің XV өңіраралық ынтымақтастық форумын ұйымдастыру барысында SUCCESS K компаниясымен келісімшарт жасасуға ықпал еткен. Айыптау тарапының нұсқасына сәйкес, форумды өткізуге арналған смета негізсіз екі есе ұлғайтылып, соның нәтижесінде мемлекеттік бюджеттен 1 миллиард теңгеден астам қаржы жымқырылған.

“БҰЛ МЕНІҢ ЖҰМЫСЫМ ЕМЕС”

Қожағапанов сотта екі сағаттан астам уақыт бойы куәлік берді, алайда оның көп бөлігі өзінің кәсіби тәжірибесі туралы әңгімелеуге жұмсалды. Тікелей форум мәселесіне көшкен кезде айыпталушы сметаларды әзірлеу мен мемлекеттік сатып алуларды жүргізу оның вице-министр ретіндегі міндеттеріне кірмегенін мәлімдеді.

Экс-вице-министрдің айтуынша, оның Қазақстан-Ресей форумындағы рөлі "саяси сүйемелдеумен" ғана шектелген. Ол тек ресейлік әріптестерімен байланыс орнатып, президент пен шенеуніктердің баяндамаларын дайындауға қатысқанын алға тартты.

“ІС ҚОЛДАН ЖАСАЛҒАН”

Қожағапанов өзіне қарсы қылмыстық іс қолдан жасалған деп тағы мәлімдеді. Оның айтуынша, айыптау тарапының басты куәгері – Гүлзат Жуаспақова. Яғни бұрынғы туризм индустриясы комитеті төрағасының орынбасары, ол Арыстанбек Мұхамедиұлымен байланысты іс бойынша екі жылға бас бостандығынан айырылған.

Экс-шенеуніктің пікірінше, Жуаспақова айыптаушы тарапқа жалған куәлік ету арқылы жеңіл жаза алған.

Бұрынғы вице-министр Жуаспақованың мәдениет және спорт министрлігінен кеткеннен кейін де Мұхамедиұлының қарамағында жұмыс істегенін, сондай-ақ оның қылмыстық іс бойынша ерекше жеңілдетілген процессуалдық шараға ие болғанын алға тартты.

Сонымен қатар, ол сол кезде мәдениет және спорт министрлігін басқарған Арыстанбек Мұхамедиұлының да жауапкершілігі туралы тұспалдап өтті.

СОТ ОТЫРЫСЫ КЕЛЕСІ АПТАҒА ШЕГЕРІЛДІ

Бұл істі қарастырып жатқан судья Қанат Тобағалиұлы сот отырысын келесі аптаға, 3 сәуірге қалдырды. Қожағапанов сәрсенбі күні куәлік беруін жалғастырады.

Бұрынғы вице-министр былтыр наурыздан бері қамауда отыр.

26 наурызда SUCCESS K агенттігінің бас директоры Ләззат Көккөзова сотта куәлік берді. Оның айтуынша, форумды ұйымдастыру бойынша тендерге Kazakh Tourism және APEX компаниялары да қатысқан, бірақ ол бұл туралы тек сот процесі кезінде ғана білген.