«Өлі жандарға» жалақы төлеген: Алматы облысында мектеп басшылығы 5,8 млн теңге жымқырған

Алматы облысында №3 арнайы мектеп-интернатының директоры, оның орынбасары және бас бухгалтері бюджет қаражатын жымқырғаны үшін сотталды. Олар адамдарды жалған жұмысқа орналастыру арқылы 5,8 миллион теңгені заңсыз иемденген, деп хабарлайды MadeniPortal.kz облыстық прокуратураға сілтеме жасап.

Заңбұзушылықты Қарасай ауданының прокуратурасы Алматы облысы білім басқармасына қарасты №3 облыстық арнайы мектеп-интернатын тексеру барысында анықтаған.

Тексеру нәтижесінде мекеме басшылығы іс жүзінде жұмыс істемейтін адамдарды қызметкер ретінде рәсімдеп, олардың атына жалақы аударып отырғаны белгілі болды. Осылайша 5,8 миллион теңге бюджет қаражаты жымқырылған.

Прокуратура материалдары негізінде Қазақстан Республикасы Қылмыстық кодексінің 189-бабы («Сеніп тапсырылған бөтен мүлікті иемденіп алу немесе талан-таражға салу») бойынша сотқа дейінгі тергеп-тексеру жүргізілді.

Сот мектеп-интернат директорын, оның орынбасарын және бас бухгалтерін кінәлі деп танып, әртүрлі жаза тағайындады. Алайда олардың нақты қандай жаза алғаны прокуратура хабарламасында көрсетілмеген.

Қадағалау органы кәмелетке толмағандардың құқықтарын қорғау және бюджет қаражатының заңды жұмсалуын қамтамасыз ету бағытындағы жұмыстар жалғасатынын мәлімдеді.