Оқушылар мұғалімнен озып кетті ме? Астанада мектеп директорлары жасанды интеллектіні тізгіндеуді үйренбек

18 ақпанда елордадағы №91 мектеп-гимназиясында білім беру саласындағы айтулы жиын — «AI91» форумы өтеді. Бұл жолы мектеп директорлары мен мамандар жасанды интеллектіні (ЖИ) оқу процесіне қалай тиімді енгізу керектігін талқылайды.

Неге бұл маңызды?

Бүгінгі таңда мектептерде қызық жағдай қалыптасты: оқушылар нейрожелілерді мұғалімдерге қарағанда әлдеқайда жылдам меңгеріп алды. Ал мектеп басшылары өздері жақсы білмейтін технологиялар бойынша шешім қабылдауға мәжбүр. Сондықтан бұл форум — құрғақ теория емес, директорларға арналған нақты нұсқаулық болмақ. Жиынды «Amansultan» платформасы мен №91 мектеп-гимназиясы қалалық Білім басқармасының қолдауымен ұйымдастырып отыр.

Министрлер мен 11-сынып оқушысы бір үстелде

Форумның ең қызықты сәті панельдік пікірталас болмақ. Онда вице-министрлер Ростислав Коняшкинмен Асылбек Ахметжанов мектептің болашағы туралы сөз қозғайды. Бірақ жиынның басты кейіпкері — №91 мектептің 11-сынып оқушысы Жәңгір Абуов. Ол өз мектебінде «ЖИ министрі» деген ерекше лауазымды иеленген. Оқушының жоғары лауазымды шенеуніктермен бір қатарда отырып, білім беру стратегиясын талқылауы — бүгінгі заманның нақты көрінісі болса керек.

Теориядан — практикаға

Жиын барысында Microsoft мамандары мен тәжірибелі директорлар ЖИ-дің көмегімен мұғалімдердің жүктемесін қалай азайтуға болатынын көрсетеді. Мысалы, Microsoft Copilot, NotebookLM және Canva сияқты құралдар сабақты қызықты өткізуге ғана емес, мұғалімнің уақытын үнемдеуге де көмектеседі. Мұғалімдердің «кәсіби сарқылуымен» қалай күресуге болады деген сұрақ та назардан тыс қалмайды.

Мектеп кабинеттеріндегі тәжірибе

Форум тек мінбердегі сөздермен шектелмейді. Екінші бөлімде қатысушылар мектеп кабинеттеріне барып, ашық сабақтар мен шеберлік сыныптарына қатысады. Мұнда «Киберқауіпсіздік әліппесі» мен «Ертегі-lab» сияқты тың жобалар таныстырылады. Сондай-ақ, Жәңгір Абуов мектеп қабырғасындағы инновациялық технологиялар зертханасын ашады.

Жиын соңында қатысушыларға арнайы сертификаттар табысталып, мектептерді цифрландырудың нақты жоспарлары бекітіледі.