Отбасы банкте қандай өзгерістер болады? Тоқаев заңға қол қойды

Қасым-Жомарт Тоқаев «Қазақстан Республикасының кейбір заңнамалық актілеріне тұрғын үй саясатын реформалау мәселелері бойынша өзгерістер мен толықтырулар енгізу туралы» заңға қол қойды, деп хабарлайды madeniportal.kz orda.kz тілшісіне сілтеме жасап. 

Заңның мақсаты – тұрғын үй жағдайын жақсартуға мұқтаж қазақстандықтарды мемлекеттік қолдау тетіктерін жетілдіру. Түзетулердің бірінші блогында «Отбаса Банк» базасында азаматтарды тіркеу және тұрғын үй бөлу мәселелерімен орталықтандырылған түрде айналысатын Даму және қолдау институты құрылады деп болжанады. 

Бұл тәсіл бірінші кезекте ұзақ уақыт пәтер кезегінде тұрғандарды баспанамен қамтамасыз етуге мүмкіндік береді.

Түзетулердің екінші блогында баспанаға мұқтаж жандарға қосымша кепілдіктер қарастырылған.

Үшінші блок – қазақстандықтардың мемлекеттен алған пәтерлерді иелену және пайдалану шарттарын реттейтін толықтырулар мен нақтылаулар.

Төртінші блок жер заңнамасының, құрылыс туралы заңдардың және жеке тұлғалардың депозиттеріне кепілдік беру туралы заңдардың жекелеген тармақтарын жетілдіруге бағытталған.