«Қазақ тілімен қатар қолданылады»: Дәурен Абаев орыс тілінің мәртебесіне тоқталды

Қазақстанның Ресейдегі елшісі Дәурен Абаев елдегі орыс тілінің мәртебесі, мәдени әралуандық және екі мемлекет арасындағы білім мен мәдениет саласындағы ынтымақтастық туралы пікір білдірді. Бұл туралы Қазақстанның Ресейдегі елшілігі мен «Ресей халықтары» халықаралық апталығының ресми сайтында жарияланды, деп хабарлайды MadeniPortal.kz.

Дипломат Мәскеуде өткен «Ресей халықтары» халықаралық апталығы аясындағы «Халықаралық мәдени-гуманитарлық ынтымақтастықтың форматтары, қатысушылары және келешегі» атты панельдік сессияға қатысты.

Абаевтың айтуынша, Қазақстан әлемдегі технологиялық өзгерістерге бейімделе отырып, ұлттық дәстүрлер мен мәдени ерекшеліктерді сақтауға ұмтылады.

Дәурен Абаев Қазақстандағы мәдени және этностық әралуандыққа тоқталып, орыс тілінің екі ел арасындағы білім беру байланыстарындағы рөлін атап өтті.

Елшінің мәліметінше, қазіргі уақытта Ресейде Қазақстаннан барған 60 мың студент білім алып жатыр. Сонымен қатар Қазақстанда ресейлік жоғары оқу орындарының тоғызға жуық филиалы жұмыс істейді. Олар техникалық және гуманитарлық бағыттар бойынша мамандар даярлайды.

Дипломат екі ел арасындағы мәдени ынтымақтастықты жаңа деңгейге көтеру қажеттігін де айтты. Оның пікірінше, тараптар концерттер, көрмелер мен театр қойылымдарын алмасумен шектелмей, бірлескен шығармашылық жобаларды дамытуы керек.

Қазақстанның Ресейдегі елшілігінің хабарлауынша, кездесуге Ресей президентінің халықаралық мәдени ынтымақтастық жөніндегі арнайы өкілі Михаил Швыдкой және мәдениет, кино, қоғамдық дипломатия салаларының өкілдері қатысты.

Жиында мәдени байланыстарды нығайту, бірлескен жобаларды қолдау және халықтар арасындағы өзара түсіністікті арттыру мәселелері талқыланды.