Қазақстанда Ұлттық пантеонға кімдер жерленетіні өзгерді: Үкімет жаңа тізімді бекітті

Қазақстан Үкіметі Ұлттық пантеонға жерлеу тәртібіне өзгерістер енгізді. Жаңа қаулыға сәйкес, пантеон аумағына жерленуі мүмкін мемлекеттік қайраткерлердің тізімі кеңейтілді, деп хабарлайды MadeniPortal.kz.

Өзгерістер Қазақстан Республикасы Үкіметінің 2020 жылғы 15 сәуірдегі №208 қаулысымен бекітілген Ұлттық пантеон туралы ережеге 2026 жылғы 4 қарашадағы қаулы негізінде енгізілді.

Жаңартылған ережеге сәйкес, Ұлттық пантеонға жерленуі мүмкін тұлғалар қатарына Қазақстанның вице-президенттері, Құрылтай төрағалары мен олардың орынбасарлары, Қазақстан Халық кеңесінің төрағалары мен орынбасарлары, сондай-ақ Қауіпсіздік кеңесі төрағасының орынбасарлары енгізілді. Сонымен қатар құжатта Қазақстан президенттері мен олардың отбасы мүшелерін, премьер-министрлер мен олардың орынбасарларын, мемлекеттік органдардың басшыларын, министрлерді, әкімдерді, сондай-ақ ел дамуына ерекше еңбек сіңірген өзге де мемлекеттік қайраткерлер мен азаматтарды жерлеу мүмкіндігі қарастырылған.

Жерлеу рәсімі марқұмның жұбайының, жақын туыстарының немесе заңды өкілінің өтініші негізінде ұйымдастырылады. Астана қаласының, облыстардың және республикалық маңызы бар қалалардың жергілікті атқарушы органдары қажетті құжаттарды рәсімдеуге, жерлеу жабдықтарын қамтамасыз етуге, марқұмның денесін Ұлттық пантеонға жеткізуге және жерлеу рәсімін өткізуге жауапты болады.

Айта кетейік, Ұлттық пантеон Астана қаласында орналасқан. Ол елдің дамуына елеулі үлес қосқан көрнекті мемлекет, ғылым және мәдениет қайраткерлерінің, сондай-ақ Қазақстанға ерекше еңбек сіңірген азаматтардың есімін мәңгі есте қалдыру мақсатында құрылған.