Қазақстанда әйгілі брендтердің көшірмелері сатылғаны әшкере болды

Қазақстанға контрафактілік өнімдер мен танымал брендтердің жалған тауарлары әкелініп, кейін олар қалалық базарларда сатылған. Бұл туралы депутат Мархабат Жайымбетов мәлімдеді, деп хабарлады MadeniPortal.kz  Tengrinews.kz-ке сілтеме жасап.

Депутаттың айтуынша, Қазақстанда Colgate брендімен жалған тіс пастасы сатылған. Оның сөзінше, өнім сырттай түпнұсқаға ұқсас болғанымен, қаптамасы мен таңбалануы дұрыс болмаған.

Сондай-ақ жалған тауарлар Алматы мен Шымкент қалаларындағы базарлардан да анықталған: ол жерлерде Bonduelle брендімен контрафактілік консервіленген көкөністер сатылған.
«Құрылыс материалдары, алкоголь өнімдері, құрғақ ашытқы сияқты тауар топтары бойынша да контрафакт деректері тіркелді. Аталған тауарлар құжаттарсыз, міндетті таңбалаусыз және санитарлық-эпидемиологиялық қорытындыларсыз таратылған, бұл азаматтардың қауіпсіздігіне тікелей қауіп төндіреді», – деді Жайымбетов депутаттық сауалында.

Оның мәліметінше, 2025 жылы тәркіленген контрафактілік өнім көлемі 2024 жылмен салыстырғанда 10 есе артқан.

«Алайда бұл көрсеткіш көлеңкелі айналымның нақты ауқымын көрсетпейді, олардың көлемі әлдеқайда жоғары болуы мүмкін», – деп есептейді мәжіліс депутаты.

Депутаттың айтуынша, контрафактілік өнімдердің басым бөлігі Қазақстанға кеден мен салықтық бақылауды айналып өтетін «сұр» схемалар арқылы, әсіресе Ресей және Қытаймен шекара арқылы, соның ішінде «Қорғас» бағытымен жеткізіледі.