Қазақстанда ұялы байланысқа қатысты жаңа талаптар күшіне енді

Бүгін, 20 тамыздан бастап Қазақстанда ұялы байланыс саласына қатысты бірқатар жаңа талап күшіне енді. Өзгерістер мобильді тарифтерден бастап смартфон сатуға дейінгі талаптарды қамтиды, деп хабарлады MadeniPortal.kz.

Енді байланыс операторлары тариф бағасын көтеретін болса, абоненттерді кемінде екі ай бұрын SMS арқылы хабардар етуге міндетті. Бұл ақпарат оператордың ресми интернет-ресурсында да алдын ала жариялануы тиіс.

Сондай-ақ мобильді операторлар eGov, eGov Business, eOtinish және Aitu секілді әлеуметтік және мемлекеттік маңызы бар қосымшаларға тәулік бойы тегін қолжетімділікті қамтамасыз етуі керек.

Смартфон сатуға қатысты талаптар да күшейтілді. Сатушы сатып алушыға төлем жасалғанға дейін құрылғының IMEI-кодын көрсетуге міндетті. IMEI нөмірі фискалдық чек пен сатып алуды растайтын құжатта да жазылуы керек. Ал верификациядан өтпеген смартфондарды сатуға тыйым салынады.

Телефон сатып аларда құрылғыдағы, қораптағы және сатып алу құжатындағы IMEI-кодтардың бірдей екенін тексерген жөн. Смартфондағы кодты *#06# пәрменін теру арқылы білуге болады.

Талапқа сәйкес келмейтін смартфон сатылған жағдайда тұтынушы оны ауыстыруды немесе ақшасын қайтаруды талап ете алады. Жаңа ережелер маркетплейстерге де қолданылады.