«Қызымды мектепке емес, қабіріне іздеп барамын»: Арыстағы жантүршігерлік жол апаты сотта қаралды (ВИДЕО)

Түркістанда Арыс қаласында болған жантүршігерлік жол апатына қатысты сот процесі жалғасып жатыр. Маусым айында болған апат салдарынан екі бала мен жүкті әйел қаза тапқан. Көлікті мас күйінде басқарды деп айыпталған мұғалім сот алдында жауап беруде, деп хабарлады MadeniPortal.kz.

Бұл туралы "Жетінші арна" жазды. Сот жарыссөзі кезінде марқұмдардың туыстары айыпталушыны кешірмейтіндерін айтып, оған барынша қатаң жаза тағайындауды сұрады.

Іс материалдарындағы мәліметке сәйкес, жүргізуші көлігімен жеке үйдің ауласында отырған адамдарды қағып кеткен. Салдарынан үш адам – екі бала мен жүкті әйел көз жұмған. Тағы бір адам ауыр жарақат алып, екі адам орташа дәрежедегі дене жарақаттарымен ауруханаға жеткізілген.

Мемлекеттік айыптаушы Ақжарқын Оразбай соттан айыпталушы Қасымованы 10 жылға бас бостандығынан айырып, көлік құралын басқару құқығынан өмір бойына айыруды сұрады. Сонымен қатар оның асырауында 14 жасқа толмаған қызы бар екенін ескеріп, тағайындалған жазаны орындауды бір жылға кейінге қалдыруды ұсынды.

Сотта зардап шеккен Дана Үсімбек те сөз сөйледі. 30 жастағы әйел мен оның бір жарым жастағы баласы апаттан ауыр жарақат алған. Ал бес жастағы қызы оқиға орнында көз жұмған.

«Біз бағып-қағып, өсірген баламыздан айырылдық. Мен өзім мүгедек болып қалдым. Менің де, баламның да денсаулығы енді бұрынғыдай болмайды. Қызымды мектепке апаруға құжат жинаудың орнына, қазір оның қабіріне барып, Құран оқимын», – деді Дана Үсімбек.

Айыпталушы өз кезегінде жасаған ісіне өкінетінін айтып, марқұмдардың жақындарынан кешірім сұрады. Сондай-ақ мүгедектігі бар кәмелетке толмаған қыз тәрбиелеп отырғанын алға тартып, соттан жазасын жеңілдетуді өтінді.

Іс бойынша сот үкімі 7 қыркүйекте жарияланады деп жоспарланған.