Шымкентте банк мүгедек азаматтың қайтыс болған әйелінен қалған үйдің құжаттарын бермей келген

Шымкентте банк мүгедек азаматтың қайтыс болған әйелінен қалған үйдің құжаттарын бермей келген, деп хабарлады MadeniPortal.kz.

Шымкент қаласының тұрғыны Мұрат Нышанов (аты өзгертілген) – 1967 жылы туған, екінші топтағы мүгедек. Бірнеше жыл бұрын ол өмірінің ең қиын кезеңін бастан өткерді: сүйікті жұбайы қайтыс болып, артында кепілге қойылған несие мен үйдің құжаттары қалды. Банк қарызды кешіргенімен, құжаттарды қайтармай, отбасының болашағын белгісіз күйде қалдырды.

Мұрат үшін бұл жай ғана заңдық дауға айналған іс емес, өмірдің жаңа сынағы еді. Мүгедектігіне байланысты тұрақты табыс көзі жоқ, ресми жұмысқа тұру мүмкіндігі шектеулі. Осындай жағдайда ол «Қарызсыз қоғам» жобасының 19-ағымына қатысып, қаржылық сауаттылық курсын өтті. Жобаның мамандары оның мәселесін жергілікті өкілдік арқылы көтеріп, қажетті құжаттарды қайтарып, мәселені түпкілікті шешуге көмектесті.
«Мен үшін бұл үй – жай баспана емес, марқұм жұбайымның аманаты еді. Енді тыныш ұйықтай аламын», – дейді Мұрат.

Қазақстанда бүгінде 700 мыңнан астам мүгедектігі бар адам тұрады – бұл ел халқының шамамен 3,5 пайызын құрайды. Олардың шамамен 300 мыңы еңбекке қабілетті жаста, бірақ соның тек жартысына жуығы ғана ресми жұмыспен қамтылған. Бұл – қоғамдағы әлеуметтік теңсіздіктің айқын көрсеткіші. 

Мүгедектігі бар азаматтар үшін қаржылық қолдау – өмір сапасын жақсартудың маңызды тетігі. Осы бағытта «Қарызсыз қоғам» жобасы бірнеше нақты шешім ұсынады:

• Қаржылық сауаттылық бойынша тегін курстар мен жеке консультациялар;

• Арестті алу және банкроттық рәсімдерін жүргізу;

• Қарыз құрылымын қайта қарау, төлем графигін жеңілдету;

• Әлеуметтік қорғау органдарымен бірлескен қолдау тетіктері.

Мұндай жүйе азаматтарға тек қарыздан құтылуға емес, өз өмірін қайта реттеуге мүмкіндік береді. Қаржы ұйымдары көбіне инклюзивті қызметтерді толық ұсына алмай отырғандықтан, мүгедектігі бар адамдар банк жүйесіне сенімсіз қарайды. Зерттеулерге сүйенсек, олардың 60 пайыздан астамы банктерге сенбейді, ал 40 пайызы бұрын несие рәсімдеп, оны қайтара алмай қалған.

Сондықтан «Қарызсыз қоғам» жобасы тек борыш мәселесін шешумен шектелмейді. Бұл бастама – қолжетімді қаржы мәдениетін қалыптастыруға, азаматтардың құқықтық қорғанын күшейтуге және қоғамдағы тең мүмкіндіктерді кеңейтуге бағытталған қадам.