Талғардағы оқиға. Шерзаттың әпкесі халықтан кешірім сұрады

Талғарда кісі қолынан қаза тапқан 16 жастағы Шерзат Полаттың әпкесі Бақыт Реимова елден кешірім сұрады, деп хабарлады madeniportal.kz Адырна ұлттық порталына сілтеме жасап.

Әлеуметтік желіде тараған бейнежазбада Бақыт Реимова халыққа алғыс білдіре отырып, өз қателігін мойындайтынын айтты.

Бақыт Реимова ағасы Қаржаубай Нұрымовпен бірге 15 тәулікке қамауға алынды. Бұған дейін адвокат Асқар Қаймақов Қаржаубай Нұрымовқа қатысты ҚР ҚК-нің 202-бабы (“Бөтеннің мүлкін қасақана жою немесе бүлдіру”) бойынша қылмыстық іс қозғалғанын мәлімдеген. Бұл ақпаратты кейін полиция растады.

Айта кетейік, 2024 жылдың 4 қазанында Алматы облысында бір топ жас жігіт 16 жастағы Шерзат Полатты аяусыз ұрып-соғып, соның салдарынан жасөспірім қайтыс болған. Оқиғаның видеосы әлеуметтік желіде тарап, қоғамда үлкен резонанс тудырды.

10 желтоқсанда полиция Қаржаубай Нұрымовты ұстаған болатын. Оның туыстары Шерзаттың қазасына әділ тергеу жүргізуді талап еткен еді. Бұл оқиғалар кезінде Нұрымовтың “полиция қызметкеріне пышақпен шабуыл жасады” деген айып тағылғаны айтылды. Алайда, куәгерлер бұл мәліметті жоққа шығарды.

Шерзат Полаттың қазасынан кейін 12 қазанға қараған түні оның отбасының үйі өртке оранған. Туыстары бұл оқиғаны күдікті тараптың қасақана әрекетімен байланыстыруда.

Марқұмның туыстары мен қоғам белсенділері істің әділ тергелуін талап етуде. Оқиға ел арасында ашу-ыза тудырып, құқық қорғау органдарының жұмысына сын айтылуда. Қазіргі таңда тергеу жалғасып жатыр.