Тоқаев «Халықтық құрылыс» бағдарламасын жариялады: жүз мыңдаған адам жұмыспен қамтылады

Мемлекет басшысы Қасым-Жомарт Тоқаев Жолдауда тұрғын үй-коммуналдық шаруашылығын дамыту, елді мекендерді газбен және таза ауыз сумен қамтамасыз ету мәселелеріне тоқталды, деп хабарлайды MadeniPortal.kz.

Президенттің айтуынша, бұл бағыттарға қомақты қаржы бөлініп, барлық өңірді қамтитын нақты жобалар тізімі әзірленеді. Сондай-ақ ол ауқымды инфрақұрылымдық бастамаға «Халықтық құрылыс» деген атау беруді ұсынды.

Президент тұрғын үй-коммуналдық шаруашылығы саласын дамытуға және халықтың негізгі қажеттіліктерін қамтамасыз етуге басымдық берілетінін айтты. Бұл бағытта елді мекендерге газ бен таза ауыз су тарту жоспарланып отыр.

Мемлекет басшысы жоспарланған жобаларды жүйелі жүзеге асыру үшін олардың бастапқы тізімін әзірлеу қажеттігін атап өтті. Оның сөзінше, бұл тізім жекелеген өңірлермен шектелмей, елдің барлық аймағын қамтуға тиіс.

Президент халықтың үмітін ақтау мемлекеттің маңызды міндеттерінің бірі екенін жеткізді. Оның айтуынша, қолға алынатын бастамалар ел тұрғындарының игілігіне бағытталуы керек.

Қасым-Жомарт Тоқаев «Халықтық құрылыс» бағдарламасының ел экономикасын дамытудағы рөліне де тоқталды. Президент бұл бастама азаматтардың әл-ауқатын арттыруға, кәсіпкерлікті дамытуға және ұлттық экономиканы жандандыруға ықпал ететін ірі инфрақұрылымдық жоба болатынын атап өтті.

Мемлекет басшысы бастаманың тағы бір маңызды бағыты ретінде жұмыспен қамтуды атады. Оның пікірінше, ауқымды құрылыс жобалары көптеген адамға жұмыс тауып, нәтижесінде оның игілігін бүкіл халық, соның ішінде жас ұрпақ та көреді.