«Халық санының өсуінде ер адамдар ешқандай рөл атқармайды»: Демограф қоғамдағы өзекті мәселені көтерді

Демограф Аяулым Сағынбаева Қазақстандағы туу көрсеткіші мен халық санының өсуіне ер адамдардың ықпалы туралы пікір білдірді. Маманның айтуынша, демографиялық статистикада негізгі көрсеткіштер әйелдерге байланысты есептеледі, деп хабарлады MadeniPortal.kz.

Dope Söz подкастына қонақ болған демограф еліміздегі демографиялық ахуал, бала туу көрсеткіші және отбасындағы шешім қабылдау мәселелеріне тоқталды.

Аяулым Сағынбаеваның пікірінше, демографиялық үдерістерді бағалауда ер адамдардың рөлі статистикалық тұрғыдан айқын көрінбейді. Себебі халықаралық тәжірибеде туу көрсеткіштері көбіне репродуктивті жастағы әйелдер санына негізделіп есептеледі.

Маман демографиялық көрсеткіштерге ер адамның тікелей ықпалы жоқ деген пікір білдірген. Оның түсіндіруінше, отбасында қанша бала дүниеге келетінін шешуде әйелдің таңдауы маңызды орын алады.

Демографтың бұл пікірі бала тууға қатысты шешімнің кімге байланысты екені және ер адамдардың демографиялық саясаттағы орны туралы мәселені көтереді. Дегенмен туу көрсеткішінің әйелдер бойынша есептелуі ер адамдардың бала туу туралы шешімдерге мүлде ықпал етпейтінін білдірмейді. Отбасын жоспарлауға ерлі-зайыптылардың өзара келісімі, әлеуметтік жағдайы, экономикалық мүмкіндіктері және басқа да факторлар әсер етеді.

Айта кетейік, демографиялық зерттеулерде кең қолданылатын жиынтық туу коэффициенті бір әйелдің өмір бойы дүниеге әкелуі мүмкін балалардың орташа санын сипаттайды. Сондықтан мұндай көрсеткіштерді есептеу кезінде әйелдердің жас ерекшелігі мен бала туу жиілігі негізге алынады.

 

 

 

 

 

Посмотреть эту публикацию в Instagram

 

 

 

 

 

 

 

 

 

 

 

Публикация от QRNews (@qrnews.kz)