30 метр тереңдікте қалған адамдар: Суданда 82 адам қаза тапты

Суданның Батыс Кордофан штатында алтын өндіретін шахта опырылып, кемінде 82 адам қаза тапты. Тағы 50 адам жарақат алған, ал үйінді астында қалғандардың нақты саны белгісіз, деп хабарлады MadeniPortal.kz  Reuters, Associated Press және AFP агенттіктеріне сілтеме жасап.

Қайғылы оқиға Әл-Нухуд қаласының маңындағы Әл-Зара алтын кенішінде болған. Жер астындағы бір-бірімен жалғасқан бірнеше шахта опырылып, кен өндірушілер топырақ пен тау жыныстарының астында қалған.

Reuters агенттігінің 16 қыркүйектегі алғашқы мәліметінде кемінде 60 адамның қаза тапқаны хабарланған. Кейін Associated Press пен AFP жергілікті билік өкілдеріне сілтеме жасап, қаза тапқандар саны 82-ге жеткенін мәлімдеді.

Оқиға орнында іздестіру-құтқару жұмыстары жалғасуда. Алайда арнайы техниканың жоқтығы мен топырақтың тұрақсыздығы құтқарушылардың жұмысын қиындатып отыр.

AP агенттігінің хабарлауынша, құтқару жұмыстарына небәрі бір жүк көтергіш техника жұмылдырылған. Ал кейбір жұмысшылар 30 метрден астам тереңдікте қалып қоюы мүмкін.

«Топырақ пен тастарды көтеріп, 30 метрден астам тереңдіктегі адамдарды іздеуге қажетті техникамыз жоқ. Шахтада ондаған адам жұмыс істеген», – деді апаттан аман қалған Хайр әс-Сайед Джабара AP агенттігіне.

Жергілікті әкімшілік өкілінің AFP агенттігіне берген мәліметінше, 50 адам жарақат алған. Үйінді астында әлі қанша адамның жатқаны белгісіз. Қаза тапқандар саны артуы мүмкін.

Қауіпсіздік талаптары сақталмаған

Судан дәрігерлері желісі шахтада жұмысшыларды қорғауға арналған қарапайым қауіпсіздік шараларының өзі болмағанын мәлімдеді.

Reuters дерегінше, алтын кеніші шалғай жерде орналасқан. Жергілікті дереккөздер адам шығынының көп болуын қауіпсіздік ережелерінің сақталмауымен және құтқару жабдықтарының жетіспеуімен байланыстырады.

Судан Африкадағы ірі алтын өндіруші мемлекеттердің бірі саналады. Алайда елде алтынның басым бөлігі шағын және ресми бақылауы әлсіз кен орындарында өндіріледі.

2023 жылдың сәуірінен бері Суданда армия мен Жедел қолдау күштері (RSF) арасында қарулы қақтығыс жүріп жатыр. Апат болған Батыс Кордофан аймағы RSF бақылауында. Reuters мәліметінше, алтын өндіру аталған қарулы құрылымның маңызды табыс көздерінің бірі болып отыр.

Айта кетейік, Суданда шахталардың опырылуы бұған дейін де адам өліміне әкелген. Associated Press дерегінше, 2021 жылы осындай апаттан 38 адам, ал 2023 жылы 14 кенші қаза тапқан.