Қызметкер жұмысқа тым ерте келгені үшін жұмыстан шығарылды

Испанияда 22 жастағы офис қызметкері жұмысқа үнемі ауысым басталардан 40 минут бұрын келетіндіктен жұмыстан шығарылды, деп хабарлайды MadeniPortal.kz.

Іс материалдарына сәйкес, 2023 жылдан бері қызға бірнеше рет ауызша да, жазбаша да тым ерте келуге және белгіленген уақыттан бұрын жұмыс күнін бастауға тыйым салынатыны ескертілген. Соған қарамастан, ол ауысым басталуына көп уақыт қалғанда келе беріп, тіпті жұмысқа келе жатқан жолында корпоративтік қосымшада жұмысқа кірісті деп белгі қоюға тырысқан.

Жұмыс берушінің айтуынша, мұндай әрекеттер жұмыс процесіне кедергі келтірген, ішкі ережелерді бұзған және нұсқаулықтарды орындауға ниетінің жоқ екенін көрсеткен. Ерте келулерден бөлек, компанияны тағы бір жағдай алаңдатқан – қызметкер басшылықтың рұқсатынсыз қызметтік автокөліктің қолданылған аккумуляторын сатып жіберді деп айыпталған. Сот бұл оқиға қыздың адал емес мінез-құлқы жөніндегі жалпы картинаны толықтырғанын атап өтті.

Аликантедегі әлеуметтік сот қыздың шағымын қарады. Ол жұмыстан босатылуы әділетсіз болғанын алға тартты. Алайда сот оның 19 ескертуді елемей, компания ережелерін бұзуды жалғастырғанын анықтады. Шешімде мәселе “шамадан тыс уақытылы келуде” емес, белгіленген талаптарды орындаудан бас тартуда екені айтылған. Бұл Испанияның еңбек статутының 54-бабына сәйкес, ауыр құқықбұзушылық болып саналады. Қазір сот шешімі күшінде, бірақ қыз оны Валенсияның Жоғарғы сотында әлі де қайта қарата алады.

Еңбек құқығы жөніндегі сарапшылардың айтуынша, егер компания қызметкерлерді алдын ала нақты түрде хабардар етсе, жұмысқа кіру тәртібі бойынша қатаң ережелер енгізуге құқылы.