Алматыда ерлі-зайыптыны атып кеткен үй тонаушы табылмай жатыр

Алматыда үй тонауға келіп, ерлі-зайыптыны атып кеткен қаскөй табылмай жатыр. Элита санатындағы тұрғын үй кешенінде бақылау камерасы толып тұрғанымен, біреуі де істемейді екен, деп хабарлады madeniportal.kz Massaget.kz сайтына сілтеме жасап. 

Сондықтан күдіктінің түр-әлпетін де дереу анықтау мүмкін болмапты. Ал қарақшыға қарсылық танытып, оқтан жараланған күйеуі мен әйелі қазір ауруханада жатыр. Бірнеше ота жасалып, жағдайы жақсарған.

Қаланың жоғарғы жағындағы Nef Uptown кешеніндегі қылмыс 20 желтоқсанда таңда болған. Қара киініп қаруланып алған ұры пәтерге айламен кіріп алыпты.

Болжам бойынша, күдікті пәтерге кірмес бұрын, іштегі жарықты өшірген. Полицейлердің саусақ ізін алғанын қызыл бояудан байқауға болады. Сөйтіп қаскөй уақыт өткізіп барып, жарықсыз қалған үй ішіне өзін "электрикпін" деп таныстырып, есігін ашып алған.

Кіреберістегі қабырға тесіліп, жарылып кеткен. Еден мен жиһаз қып-қызыл қан. Атыстан кейін түсірілген видеодан ерлі-зайыптының ұрымен біраз алысқанын аңғаруға болады.

Тапаншаның оғы, көршілерінің айтуынша, 40 жастағы әйелдің кеуде тұсы мен білегіне, 39 жастағы күйеуінің қолына тиген. Екеуі ауыр халде ауруханаға жеткізіліпті. Ер адамға бірден ота жасалып, аман қалды. Қазіргі жағдайы орташа деп бағаланған. Енді операцияға әйелі де түсейін деп тұр.

Тергеу мәліметінше, қаскөй пәтерді тонамақ болған. Алайда жоспары жүзеге аспаған соң, полицейлер жеткенше ізін суытып үлгеріпті. Оның қай бағытқа қарай қашып, қайда жасырынып жатқаны белгісіз. Тұрғын үй кешенінде бақылау камералары болғанымен, олар істемейді. Күдікті үш күннен бері табылмай жатыр.

Оқтан жараланған отағасы сақтандыру компаниясында жұмыс істейді екен. Ал әйелі үйде бала бағып отыр.