«Анасының қайтыс болғанын екі концерт бойы айтпадық»: Жанболат Найзабек Мадиярдың басынан өткен ауыр оқиғаны еске алды

«Өнер қырандары» театрының әртісі Жанболат Найзабек әріптесі Мадиярдың басынан өткен ауыр оқиғаны айтып берді. Оның сөзінше, Мадияр сахнада өнер көрсетіп жүрген сәтте анасы дүниеден озған. Алайда театр ұжымы бұл қаралы хабарды оған бірден жеткізе алмаған, деп хабарлайды MadeniPortal.kz. 

Жанболат Найзабектің айтуынша, қайғылы жағдай театрдың гастрольдік қойылымдарының бірінде болған. Сол күні Мадияр сахнада анасының басына келіп тұрған баланың рөлін сомдап жатқан. Дәл осы уақытта Жанболатқа Мадиярдың әпкесі телефон соғып, аналарының қайтыс болғанын хабарлаған.

Бұл хабарды естіген театр ұжымы қиын шешім қабылдаған. Өйткені сол күнгі алғашқы қойылым өтіп жатқан, ал алда тағы екі сеанс болған. Әртістер Мадиярға анасының қайтыс болғанын бірден айтса, оның сахнаға қайта шыға алмайтынын түсінген. Сондықтан қаралы хабарды барлық қойылым аяқталғанша жасырған. 

Жанболаттың сөзінше, әріптестері Мадиярдың анасы қайтыс болғанын біле тұра, онымен бірге тағы екі қойылымда өнер көрсетуге мәжбүр болған.

Әртіс сол кездегі шешімдері үшін өздерін әлі де кінәлі сезінетінін жасырмады. Дегенмен олардың мұндай қадамға баруына концертке келген көрермен алдындағы жауапкершілік себеп болғанын түсіндірді.

Анасының қазасынан кейін Мадияр біраз уақыт театрдың гастрольдік сапарларына қатыса алмаған. Осыған байланысты ұжым өзге қалалардағы қойылымдарды онсыз жалғастыруға мәжбүр болған.