Нұрқожа Қайпанов Астанадағы әлем чемпионатының алтынына таласады

Қазақстандық еркін күрес шебері Нұрқожа Қайпанов Астанада өтіп жатқан 2026 жылғы әлем чемпионатының финалында белдеседі. 74 келіге дейінгі салмақ дәрежесінде оның қарсыласы ресейлік Иналбек Шериев болады, деп хабарлайды MadeniPortal.kz.

Шешуші белдесу 1 қараша күні Қазақстан уақытымен сағат 18:59-ға жоспарланған. Кездесуді Qazsport телеарнасынан және арнаның ресми сайтынан тікелей көруге болады.

Қайпанов финалға дейін төрт қарсыласын жеңді. Ол косоволық Эгзон Джониден, әзербайжандық Тұран Байрамовтан, тәжікстандық Виктор Рассадиннен және жапониялық Ёсиносукэ Аоягиден басым түсті.

Нұрқожа өз елімізде өтіп жатқан әлем біріншілігінде финалға жолдама алған Қазақстан құрамасының жалғыз өкілі атанды.

Қайпанов — 2024 жылғы әлем чемпионы. Сондай-ақ ол 2019 жылғы әлем біріншілігінде күміс, 2025 жылы қола жүлде жеңіп алған. Бұдан бөлек, балуан 2019, 2021 және 2025 жылдары Азия чемпионы атанды.

Ұйымдастыру деңгейі жоғары

Осындай ауқымды жарысты өткізу — ұйымдастырушылар үшін үлкен сын. Олар бұл міндетті абыроймен атқарды. Аренада мерекелік көңіл күй мен өзара құрмет салтанат құрды: белдесулер кестеге сай өтіп, төрешілер бейтараптық танытты, ұйымдастыру жұмыстары жүйелі жүргізілді. Лық толы трибунадағы жанкүйерлер қай елдің атынан шыққанына қарамастан, әр спортшыға қолдау көрсетті.

Жарыс барысында даулы астыртын шешімдер мен жанжалға ұласқан апелляциялар болған жоқ. Басты назар ережеге, қарсыласқа және адал бәсеке қағидаларына құрмет көрсетуге аударылды. Астана әлемдік спорт қауымдастығына қонақжайлық пен кәсібиліктің жоғары үлгісін көрсетті.

Күтпеген кездесулер мен тосын нәтижелер

Еркін күрес сайыстары тартысты әрі тосын нәтижелерге толы болды. Жеребе мықты балуандарды жарыстың алғашқы кезеңдерінде-ақ өзара жолықтырып, көрермендерге Олимпиада финалына бергісіз белдесулер сыйлады.

Еркін күрестен Қазақстан тарихындағы тұңғыш әлем чемпионы Ризабек Айтмұхан жарыстың алғашқы белдесуінде-ақ екі дүркін Олимпиада чемпионы Абдулрашид Садулаевпен кездесті. Мықты қарсыласқа тап болып, тізесінен жарақат алғанына қарамастан, Ризабек соңына дейін күресіп, қайсарлық танытты. Турнирден кейін балуанның тізесіне ота жасау қажет болды.

Бұдан кейін күрес жанкүйерлері Садулаев пен АҚШ өкілі, Олимпиада чемпионы Кайл Снайдердің тартысты белдесуіне куә болды. Көпшілік болжамына қарамастан, америкалық балуан жеңіске жетіп, басты фавориттердің бірін алтын медаль үшін таластан шығарды. Тартысқа, тактикалық айлаға және күтпеген нәтижелерге толы осындай кездесулер чемпионаттың көркін қыздырды.