Автобустағы жанжал: Орын бермегені үшін қыздың шашын жұлып, балағаттаған

Атырау қаласындағы №51 бағыттағы қоғамдық көлікте жолаушылар арасындағы жанжал студент қыздың соққыға жығылуымен аяқталды, деп хабарлайды MadeniPortal.kz.

Әлеуметтік желіде тараған видеолардан орта жастағы әйелдің студент қыздың шашынан жұлып, бетіне тырнағаны анық көрінеді. Зардап шеккен бойжеткеннің айтуынша, оқиға аялдамадан мінген әйелдің өзге жолаушыға орын беруді талап етуінен басталған.

Куәгерлердің сөзінше, автобус лық толы болғандықтан, жолаушылар екі әйелді бірден ажырата алмаған. Сол аралықта студент қыз бірнеше рет соққы алған.

Оқиғадан кейін бойжеткен полицияға арызданған. Алайда жарты күн өтсе де, күдікті әйелдің табылмағанын айтып отыр.

Желі қолданушылары қоғамдық көліктегі тәртіп пен өзара сыйластықтың маңызын атап өтіп,кейбір ересек адамдарға тәрбие сағатын өткізуді ұсынды. Көпшілік мұндай әрекеттерге заң аясында қатаң шара қолдану керектігін жазуда. Сондай ақ, кінәлі тұлғаның жауапсыз қалмауын сұрап, құқық қорғау органдарын істі жіті тексеруге шақырды.