Мақпал Жұмабай, Amen Халықаралық анимациялық фильмдер фестивалінің Президенті: «Биыл үшінші рет ұйымдастырылған шараның ашылу салтанатына ҚР Ақпарат және қоғамдық даму вице-министрі Болат Тілепов, Мәжіліс депутаты, ақын Мақпал Тәжмағамбетова, ардагер режиссер-мультипликатор Тамара Мұқанова, «Рухани жаңғыру» қоғамдық даму институты Басқарма Төрағасының орынбасары Аманбек Төлепбергенов, Nur Otan партиясы Түркістан облыстық филиалы төрағасының бірінші орынбасары Бейсен Тәжібаев қатысты. Сонымен қатар, алыс-жақын шетелдерден, еліміздің түкпір-түкпірінен анимация мамандары жиналды.

Әзербайжан, Башқұртстан (РФ), Қырғызстан, Өзбекстан, Татарстан (РФ), Тәжікстан мен Түркияның фильмдері сайысқа түсуде. Байқауға барлығы 57 өтінім келіп түсті, оның 49-ы іріктеуден өтті. Әдеттегідей оқу модулі ұйымдастырылды. 6 шетелдік маманның дәрісіне жүздеген аниматор қатысты. Кинопарк кинотеатрлар желісінде Түркі елдері үздік фильмдерінің көрсетілімі болды. Анимациялық студиялардың жәрмеңкесі өтті. Онда мультфильм жасау процесі таныстырылды. Анимация ардагері, режиссер Тамара Мұқанова қазақ анимация өнерінің дамуына сіңірген ерен еңбегі үшін Халықаралық ÁMEN анимациялық фестивалінің арнайы дипломымен марапатталды.

Amen Халықаралық анимациялық фильмдер фестивалінің барысында сүйінетін бір ісім – қазылар алқасы жұмысы. Биыл қазыларымыз 49 жұмыс қарады. Бірнеше күн фильм қараса, оны талқылау да сағаттарға созылады. Талқылау барысындағы ой-көзқарастар да бір мектеп. Биыл фестивалімізге әлемге танымал суретші-аниматор, «Ну, погоди!», «Мулан», «Король лев», «Фиксики» сынды «Союзмультфильм» мен Disney студияларының 40-тан аса жобасына қатысқан Александр Дорогов (Ресей-АҚШ), ҚР Мемлекеттік сыйлығының иегері Роза Мұқанова, кинотанушы, киносыншы Назира Мұқышева, Ұлттық киноны қолдау орталығының бас продюсері Адай Абельдинов, анимация продюсері және режиссер Мусаб Гүндүз (Түркия), режиссер-сценарист, ҚР Мәдениет қайраткері, режиссер-мультипликатор Батырхан Дауренбеков, сондай ақ халықаралық кинофестивальдердің жүлдегері Тұрдыбек Майдан қазылық етті».

Түркістанда өткен Халықаралық ÁMEN фестивалінде өзбек режиссер-аниматоры Азизбек Мухамедовтің «Дом на колесах» мультфильмі «Үздік анимациялық фильм» атанды. Өзбек режиссері байқауға екі бірдей жұмысын ұсынған. Олардың бірі «Волшебный танбур» қысқа метрлі анимациялық фильмі «Үздік қоюшы суретші» аталымында топ жарса, «Дом на колесах» туындысы фестивальдің «Үздік анимациялық фильмі» деп танылды.

Жеңімпаздар одан бөлек тағы тоғыз аталым бойынша анықталды. Екі бірдей қатысушының жобасы үздік сериал атанды. Тынышқали Тілегеновтің «Бұзығым» және Бекдос Саятұлының «Суперкөлік самұрық» мультхикаясы өзге жұмыстар арасынан оқ бойы озық тұрды.

Өзге шетелдік қатысушылар арасынан Тәжікстан мен Башқұртстан аниматорларының жұмысы жоғары бағаға ие болды. Башқұрт аниматоры Рим Шарафутдинов «Золотой дворец» туындысымен Үздік режиссерлік жұмысты жеңіп алды. Осы аталым бойынша екінші жеңімпаз – «La Gare» қысқа метрлі анимациялық фильмінің режиссері Аян Марокканский. Ал тәжікстандық қатысушысы Лолисанам Улугова «Хувайдо» мультфильмімен Үздік сценарий авторы атанды.

Байқау қоржынына келіп түскен студенттік жұмыстар екі аталым бойынша бағаланды. Мейіржан Төлепбайдың «Жанұя» мультфильмі студенттер арасындағы үздік жұмыс болса, Қазақ ұлттық өнер университетінің студенттері Малика Мақсатқызы мен Қажыбек Гүлнұрдың туындылары «Үздік студенттік режиссерлік жұмыс» марапатын иеленді.

Одан бөлек әділқазылардың арнайы сыйлығымен режиссер Нұргүл Дауытова мен Сұлтан Қыдырбаев марапатталды. Ал режиссер Мейіржан Төлепбай «Көрермен көзайымы» аталымына ие болды.

Байқауға ұсынылған комикстер арасында Мәди Өтегеновтің «Батыл сақшылар» жұмысы үздік деп танылды.

Ал фестивальдің ең жас қатысушылары Түркістан Оқушылар сарайының анимация үйірмесінің тәрбиеленушілері креативті қөзқарасы үшін марапатталды.

madeniportal.kz