12 жастағы қыз оқиға орнында көз жұмды

Байсерке ауылында кәмелет жасқа толмаған екі қызды жүк көлігі қағып, біреуі оқиға орнында жантәсілім етті, деп хабарлайды madeniportal.kz тілшісі stan.kz сілтеме жасап.

Апалы-сіңлі қыздар балабақша маңайындағы жаяу жүргіншілер жолағынан өтпек болғанда оларды жүк көлігі қағып кеткен.12 жастағы Саяна Үсен қатты соққыдан оқиға орнында көз жұмды. Ал екінші қыздың иығы сынып, ауруханаға жеткізілді. Қыздардың жақындарының айтуынша, мұндай жағдай бірінші рет болып тұрған жоқ. Себебі жол ережелеріне бағынбайтын жүргізушілер көбейген. Осылайша жол апатынан бір жылда үш мектеп оқушысы опат болған.

Жергілікті тұрғындар жасанды кедергілердің қойылуын сұрап отыр. Өйткені ауыл арасында бейнебақылау камералары мен жылдамдықты бәсеңдеткіш құралдардың жоқтығынан көлік апаты да жиі болады деп отыр.

Саяна оқыған мектеп директоры да балалардың қауіпсіздігіне алаңдаулы.

Ал аудандық автомобиль жолдары бөлімінің басшысы Байсерке ауылын кесіп өтетін жолдың облыстық маңызы бар трасса екенін айтады. Сондықтан жасанды кедергілерді кез келген жерге қоя алмаймыз деп отыр. Ақылы жолдан қашқан жүк көлігінің жүргізушілерін тоқтату үшін қазір салмақ өлшейтін таразылар қою жоспарланған екен.

Кәмелет жасына толмаған екі жаяу жүргіншіні қағып кеткен жүк көлігінің жүргізушісі қазір қамауда. Жеті баласы бар жанұя бүгін кенже қыздары Саянаны ақтық сапарға шығарып салды.