Аяусыз сабап тастаған: Қызылордадағы мектеп әжетханасында оқушылар арасында сұмдық жағдай орын алды

Қызылордада алты жасөспірім мектептің әжетханасында 10-сынып оқушысын сабап тастаған, деп хабарлайды MADENIPORTAL.KZ Skifnews.kz -ке сілтеме жасап. 

Оқушы көптеген жарақат алып, сүйегі сынған. Полиция қылмыстық іс қозғады.

Әлеуметтік желілерде мектеп әжетханасында жасөспірімдер өз қатарласын ұрып жатқаны түсірілген видео тарады. Жарияланған ақпаратқа сәйкес, оқушының жақ сүйегі мен мұрны сынған, сондай-ақ миы шайқалып, ауруханаға түскен. Жасөспірімге ота жасалып, жақ сүйегі металл пластиналармен бекітілді.

Қызылорда облыстық Полиция департаменті мәліметінше, бір топ адам жасаған бұзақылық дерегі бойынша қылмыстық іс қозғалған. Барлық күдікті жасөспірім ұсталып, полицияға жеткізілді.

"Қазір оқиғаның барлық мән-жайын анықтауға бағытталған қажетті шаралар жүргізіліп жатыр. Сондай-ақ кінәлі жасөспірімдердің заңды өкілдері балаларды тәрбиелеу жөніндегі міндеттерін тиісті деңгейде орындамағаны үшін жауапкершілікке тартылады", – делінген полицияның баспасөз қызметі таратқан хабарламада.

Ведомство өкілдері бұл оқиға бойынша кәмелетке толмағандар ісі жөніндегі комиссияға ұсыныс енгізілгенін, ондағы мақсат осындай жағдайлардың алдын алу үшін қосымша шаралар қабылдау және себептерді жою екені айтылды.