Әйел адам екі тәулікке жуық мұржаға кептеліп қалған

Эстонияда 66 жастағы әйел күйені тазалау кезінде болған жазатайым оқиғадан кейін өз үйінің мұржасында қыстырылып, шамамен екі тәулікке жуық уақыт өткізген, деп хабарлады MadeniPortal.kz.

Оқиға ауылдардың бірінде болып, қайғылы жағдаймен аяқталуға шақ қалған.

Өзін Элле деп таныстырған әйел үлкен үйде жалғыз тұрады. Сенбі күні ол аршаның бұтағын пайдаланып, мұржаны өз бетімен тазалауға шешім қабылдайды. Қолын күйе жиналған тар жерге сұғып, кірді алып тастамақ болған сәтте кірпіш қалауынан бір тас сынып түсіп, қолын басып қалады.

Әйел өздігінен босай алмаған — телефоны қолы жетпейтін жерде болған. Осы күйде ол бүкіл демалыс күндерін өткізіп, күшін сақтап, есінен танып қалмауға тырысқан. Оның айтуынша, осы уақыт бойы тірі қалу және қолын одан әрі қатты жарақаттап алмау үшін барын салған.

Дабылды дүйсенбі күні әйел жұмысқа шықпаған кезде әріптестері қаққан. Оқиға орнына келген құтқарушылар зардап шегушіні босату үшін мұржаның төменгі бөлігін ішінара бұзуға мәжбүр болған. Кейін ол ауруханаға жеткізілді.

Қазір әйел тірі қалғанына қуанып, өзінің оқиғасы өзгелерге сақ болуға әрі мұндай жағдайларда көмекті тезірек шақыруға сабақ болады деп үміттенеді.