«Астана Операда» «Чарли мен Ирэн» романтикалық балет-комедиясының әлемдік премьерасы өтеді

31 қазан мен 1 қарашада «Астана Опера» театрында композитор Алексей Кестнердің музыкасына жазылған «Чарли мен Ирэн» романтикалық балет-комедиясының әлемдік премьерасы өтеді. Қойылымның дирижері – Элмар Бөрібаев. Ал қоюшы хореограф Кирилл Радев жаңа спектакльдің ерекшеліктері, дыбыссыз кино эстетикасы және елордалық театр әртістерімен жұмыс барысы туралы айтып берді, деп хабарлайды MadeniPortal.kz.

«Астана Опера» балет труппасы үшін арнайы дайындалған қойылым 1970 жылдардағы Нью-Йорктің атмосферасы мен дыбыссыз кино дәуірінің эстетикасын тоғыстырады. Неоклассикалық бағыттағы спектакльдің либреттосын Валерий Копейкин жазған. 

Дыбыссыз кино мен балет қалай тоғысады?

Қоюшы хореограф Кирилл Радевтің айтуынша, жаңа спектакльдің басты ерекшелігі – оқиғаны кинематография заңдылықтарына сүйене отырып, би тілімен жеткізу.

Хореограф қойылым атауындағы Чарли есімі көрерменге әйгілі Чарли Чаплинді еске түсіргенімен, спектакль оның өміріне арналмағанын ерекше атап өтті.

Байлық пен махаббат арасындағы таңдау

Балет-комедияның оқиғасы Нью-Йорктегі Орталық саябақтың көңілді тұрғыны, баспанасыз жүрген ақкөңіл Чарли мен жоғары қоғам өкілі Ирэннің төңірегінде өрбиді.

Екеуінің кездейсоқ таныстығы бірте-бірте шынайы махаббатқа ұласады. Алайда Ирэннің ықпалды әрі ештеңеден тайынбайтын әкесі олардың қарым-қатынасына үзілді-кесілді қарсы болады.

Оқиға күтпеген жерден басқа арнаға бұрылады. Чарлидің өмірінде жолынан адасқан жұмбақ Пошташы пайда болып, оған хат табыстайды. Хатта айтылған күтпеген мұра кешегі кедейді бір сәтте дәулетті адамға айналдырады.

Дегенмен қойылымның негізгі идеясы байлыққа қол жеткізуде емес. Спектакль көрерменді маңызды сауал төңірегінде ойлануға шақырады: Чарли дәулетті адамға айналғаннан кейін де мейірімділігін, мәрттігін және жүрегінің тазалығын сақтап қала ала ма?

Кирилл Радевтің түсіндіруінше, Пошташы бейнесі – өмірдегі өзгерістердің символы, өзіндік метафора.

Спектакльге арналған музыка әлі де жетілдіріліп жатыр

Жаңа балет-комедияның музыкасы арнайы осы қойылым үшін жазылып жатыр. Композитор Алексей Кестнер мен шығармашылық топ спектакльдің музыкалық шешімдерін ұзақ уақыт бойы талқылаған.

1970 жылдардағы Нью-Йорк заманауи сахнада көрініс табады

Қойылымның көркемдік безендірілуіне де ерекше назар аударылған. Спектакльдің сценографтары – Анастасия Капустина мен Наталья Шахматова. Ал костюмдердің дизайнын танымал сәнгер Игорь Чапурин әзірлеген.

Шығармашылық топ 1970 жылдардағы Нью-Йорктің жарқын түстерін, киім үлгілерін және сол кезеңге тән ерекше атмосфераны сақтай отырып, оларды заманауи сахналық шешімдермен ұштастыруды көздейді.

«Астана Опера» әртістерінің дайындығы қалай жүріп жатыр?

Қоюшы хореограф елордалық театрдың балет труппасымен жұмыс істеуді әлдеқашан бастап кеткен. Оның айтуынша, шығармашылық ұжымның кәсіби деңгейі мен жұмысқа деген жауапкершілігі қойылымды дайындауға қолайлы жағдай жасап отыр.

Жаңа спектакльдің дайындық барысын театрдың балет труппасының көркемдік жетекшісі, Ресейдің халық әртісі Алтынай Асылмұратова жеке бақылауда ұстап отыр.

Кирилл Радевтің сөзінше, көркемдік жетекші шығармашылық ізденіске толық еркіндік берген.

Басты рөлдерді кімдер орындайды?

«Чарли мен Ирэн» спектаклінде «Астана Опера» балет труппасының жетекші солистері мен әртістері өнер көрсетеді.

Ақкөңіл әрі мейірімді Чарлидің бейнесін Досхан Зәйдін мен Әлихан Әубәкір сомдайды. Сонымен қатар Әлихан Әубәкір Александр Корниловпен бірге жұмбақ Пошташының рөлінде де сахнаға шығады.

Ал махаббатта әлеуметтік дәрежеден гөрі шынайы сезімді жоғары қоятын Ирэннің партиясын Шұғыла Әдепхан, Камила Шахманова, София Әділханова және Алина Зырянова орындайды.

Полдың рөлін Олжас Тарланов, Айдан Қалжан және Жақсылық Сауқымбеков сомдайды.

Сондай-ақ спектакльге Дарья Митрофанова, Әлия Әмірхан, Амир Хван және Ахмет Қабкенов қатысады. 

«Чарли мен Ирэн» романтикалық балет-комедиясының әлемдік премьерасы 31 қазан мен 1 қарашада «Астана Опера» театрында Қазақстан Республикасы Мәдениет және ақпарат министрлігінің қолдауымен өтеді.