Бибісараның мәлімдемесінен кейін министрлік барлық қаржыландыруды ашық айтты

Бибісараның мәлімдемесінен кейін министрлік нақты сандарды жариялады, деп хабарлайды  MadeniPortal.kz.

Қазақстанның ең танымал шахматшыларының бірі Бибісара Асаубаева әлеуметтік желідегі мәлімдемесінде жалақысының қысқарғанын және қаржылық қолдау мәселелерін көтерді. Алайда бұл жағдайға қатысты Туризм және спорт министрлігі ұсынған деректер мүлде басқа көріністі көрсетіп отыр.

Министрлік мәліметінше, Бибісараға көрсетілетін мемлекеттік қолдау соңғы жылдары азаймаған, керісінше тұрақты түрде өсіп келеді. Егер 2024 жылы спортшыға 64 миллион теңге бөлінсе, 2025 жылы бұл көрсеткіш 79 миллион теңгеге дейін артқан. Ал 2026 жылы мемлекет тарапынан бөлінген қаржы көлемі 100 миллион теңгені құраған.

Вице-министр Серік Жарасбаевтың айтуынша, бұл қаражатқа қоса Қазақстан шахмат федерациясы тарапынан да қолдау көрсетілген. Нәтижесінде Бибісараға 2025 жылы шамамен 160 миллион теңге, ал 2026 жылы 210 миллион теңге көлемінде қаржыландыру қарастырылған.

Дегенмен спортшының бұрынғы 1 миллион теңгелік жалақысы қысқарған. Бірақ министрлік мұның себебін нақты түсіндірді: шахмат басым спорт түрлерінің тізімінен шығарылғаннан кейін Спортты дамыту дирекциясы арқылы төленетін еңбекақы көлемі қайта қаралған. Бұл жеке Бибісараға қатысты қабылданған шешім емес, барлық спорт түрлеріне ортақ қағидалар аясында жүзеге асқан өзгеріс.

Сонымен қатар министрлік Sport Qory арқылы қосымша қаржы бөлу туралы өтінімнің мақұлданғанын, алайда қордағы қаражаттың жеткіліксіз болуына байланысты бұл төлем жүзеге аспағанын мәлімдеді. Яғни, мәселе қолдау көрсеткісі келмеуде емес, қаржылық мүмкіндіктердің шектеулі болуында.

Бибісара Асаубаева – Қазақстанның мақтанышы, әлемдік деңгейдегі спортшы. Сондықтан оның мәселелері назардан тыс қалмауы тиіс. Бірақ ресми деректерге сүйенсек, мемлекет шахматшыны қолдауды тоқтатқан жоқ. Керісінше, соңғы жылдары бөлінетін қаржы көлемі артып келеді.

Сондықтан бұл жағдайда мәселені тек жалақының қысқаруы тұрғысынан емес, жалпы көрсетілген қолдау көлемі арқылы бағалаған жөн. Ал жарияланған сандар мемлекет пен федерацияның елдегі ең үздік шахматшылардың біріне қолдау көрсетуін жалғастырып отырғанын көрсетеді.

 

 

 

 

 

Посмотреть эту публикацию в Instagram

 

 

 

 

 

 

 

 

 

 

 

Публикация от МӘДЕНИЕТ ПОРТАЛЫ (@madeniportal.kz)