Еден жуып, шаң сүртіп, қабырғаларды әктеген: Атырауда академия мұғалімі шағымданды

Атыраудағы Н.Тілендиев атындағы кіші өнер академиясының мұғалімі әлеуметтік желіде кабинет жөндеу мен тазалық жұмыстарына тартылғанын айтып, шағымданды, деп хабарлайды MadeniPortal.kz kaz.inform.kz сілтеме жасап. 

Педагогтің сөзінше, ол бір апта бойы кабинетті тазалап, қабырғаларын әктеген. Кейін одан плафондарды сүрту де талап етілген. Оқиғаға қатысты облыстық білім басқармасы тексеру жүргізетінін хабарлады.

Н.Тілендиев атындағы кіші өнер академиясы — дарынды балаларға арналған интернаттық мекемесі бар мамандандырылған мектеп. 

Жазба авторының айтуынша, оған өзі сабақ беретін кабинетті ретке келтіру және жөндеу жұмысы жүктелген. 

Педагог бастапқыда жанжал туындағанын қаламағандықтан, жұмысты орындағанын жазған. Оның сөзінше, кабинет өте нашар жағдайда болғандықтан, оқушылары мен ата-аналарының алдында ыңғайсызданған.

Мұғалім бұл жұмысты орындаудан бас тартқанын жазды. Себебі плафондарды тазалау үшін баспалдаққа шығып, электр құрылғыларымен жұмыс істеу қажет болған. Педагогтің айтуынша, оған әкімшілік тарапынан «үйде люстра жуасыз ба?» деген мазмұнда жауап берілген.

Шағым авторы мұғалімнің негізгі міндеті — білім беру екенін алға тартады. Ол кәсіби біліктілігін арттырып, оқушыларын түрлі байқаулар мен көрмелерге дайындайтынын, шәкірттерінің жетістіктері бар екенін жазған.

Әлеуметтік желідегі жазбаға байланысты Атырау облысының білім беру басқармасы жағдайды назарға алған. Басқарманың хабарлауынша, педагогтердің білім беру нысандарын жаңа оқу жылына дайындау жұмыстарына тартылуына қатысты ақпарат бойынша тиісті зерделеу жүргізіледі.

Ведомство педагогтердің еңбек құқықтарының сақталуын қамтамасыз ету мәселесін ерекше бақылауда ұстайтынын атап өтті.