Эколог Мэлс Елеусізов бұрын балабақша болған шағын үйде тұрып жатыр екен

Әлеуметтік желіде белгілі қазақстандық эколог, қоғам қайраткері Мэлс Елеусізовтің қарапайым өмірін көрсететін видео кеңінен тарап кетті. Ғаламтор қолданушылары оның өмірін қызу талқылап жатыр, тіпті кейбіреулер видеоның шынайылығына күмәнданады. Белгілі экологтың үйін "лашық секілді" деп бағалағандар көп. "Шын үйі емес, саяжайы" деп жатқандар да жетерлік. Ақиқатын білу үшін Massaget.kz тілшісі Мэлс Елеусізовті арнайы іздеп барып, қалай өмір сүріп жатқанын өз көзімен көріп келді, деп хабарлайды 

Мэлс Елеусізов бұрын балабақша болған шағын үйде тұрады екен.

Еске сала кетейік, 2015 жылы Мэлс Елеусізовтің үйі өртеніп кеткен. Тілсіз жау кесірінен эколог үйсіз, ол басқаратын экоодақ штаб-пәтерсіз, жануарлар тәлімбақсыз қалған. 

Кіреберісте бізді бірнеше ит қоршап алды, олардың арасында тазы және төбет тұқымды иттер бар. Осыдан-ақ тәлімбақтың енді осы жерден орын тепкенін аңғарамыз. Мэлс Хамзаұлы жақында аздап ауырып қалғанын айтты. Оның сауығып кеткеннен кейінгі бірінші жұмысы - осы иттерді тамақтандыру.

Мэлс Елеусізов материалдық игілікке ұмтылмайтынын жеткізді. Алайда бар өмірін сарп еткен экологиялық жобалардың мемлекет тарапынан тиісті қолдау таппағандығына налиды. Сондай  жобалардың бірі - қоқыс қалдықтарын қайта өңдейтін эксперименттік алаң болған екен. Мэлс Елеусізовтің сөзінше, 2008-2015 жылдары Алматы әкімі болған Ахметжан Есімов "тұрғындарға кедергі" желеуімен алаңды жаптыртқан.

Бақшаға кіріп, Мэлс Хамзаұлының алма мен алмұрт өсіріп жатқанын көрдік.

Бақша аумағында "Регата" жобасының көлігі де тұр. Елеусізов негізін қалаған Іле-Балқаш регатасының тарихы 2000 жылдан басталады. Өз уақытында үлкен туристік қозғалыс жасауға мүмкіндік берген жобадан тек мына ескерткіш қалыпты. 

Қарапайым өмір сүру жағдайына қарамастан, Мэлс Елеусізовтің болашаққа жоспары үлкен. Ол үйін жөндеуден өткізіп, балаларға пайдалы техникалық дағдыларды үйренетін шеберханаға айналдыруды армандайды.