Еркін күрестен Олимпиада жүлдегері сотқа тартылды

Еркін күрестен Олимпиада ойындарының қола жүлдегері Дәулет Шабанбай сотқа тартылды, деп хабарлады MadeniPortal.kz.

Іс материалдары "Сот кабинетінде" жарияланған, онда оған билік өкілдеріне күш қолданды деген айып тағылған. Басқа деректер әзірге жарияланған жоқ, танымал балуан Павлодардағы тергеу изоляторынан алдағы сот отырысына жеткізілмек.

Сот спортшыны негізгі сот талқылауына қатысу үшін Павлодардың қылмыстық істер жөніндегі ауданаралық сотына этаптауға қаулы шығарды.

Іс қаралып жатқан бап 3 жылдан 7 жылға дейінгі бас бостандығын шектеу немесе айыру жазасын қарастырады.

Павлодар облысы дене шынықтыру және спорт басқармасының басшысы Азамат Имашевтің айтуынша, 42 жастағы еркін күрес шебері Дәулет Шабанбай спорттық мансабын бес жыл бұрын Қазақстан чемпионатында екінші орын алған соң аяқтаған.

Оның ең ірі жетістіктерінің бірі - 2012 жылы Лондонда өткен Жазғы Олимпиада ойындарының қола медалі. Алайда спортшы бұл марапатты тек 2022 жылы Белградта алған, өйткені Олимпиаданың екі жүлдегері тыйым салынған препараттарды қолданғаны үшін дисквалификацияланған. Сол кезде 120 келіге дейінгі салмақта бесінші орын алған қазақстандық үшінші орынға көтерілген.

Дәулет Шабанбай - Азия чемпионаттарының төрт дүркін қола және күміс жүлдегері (2008, 2009, 2011, 2014, 2016). Сондай-ақ 2014 жылы Азия ойындарының күміс медалін жеңіп алған.