Кабинеттен 23 жастағы қыздың денесі табылған: Қарағандыда экс-полицейдің соты басталды

Қарағандыда 23 жастағы қыздың өліміне қатысты резонансты іс бойынша сот процесі басталды. Айыпталушылар орындығында – бұрынғы полиция майоры. Іс жабық режимде қаралатын болды, деп хабарлады MadeniPortal.kz.

Бұл туралы КТК жазды.

Қайғылы оқиға былтыр қыркүйекте болған. Сағат 22:00 шамасында учаскелік полиция пунктіндегі кабинеттен 23 жастағы қыздың денесі табылған. Ал көрші бөлмеде 36 жастағы полиция майоры ес-түссіз жатқан.

Оқиғадан кейін қыз бен полиция қызметкері есірткі заттарынан улануы мүмкін деген ақпарат тараған. Алайда полиция басшылығы бұл мәліметті сол кезде ресми түрде растамаған.

Экс-полицей есін жиғаннан кейін қызметінен босатылып, уақытша ұстау изоляторына қамалған. Тергеу шамамен бір жылға созылып, енді іс сотқа жетті.

Алғашқы отырысқа марқұмның анасы мен тәтесі қатысты. Олардың мүддесін облыстық прокуратура қорғайды. Сот басталар алдында айыпталушының адвокаты іс материалдарында жеке өмірге қатысты мәліметтер мен хат алмасулар бар екенін айтып, процесті жабық өткізуді сұрады.

«Іс материалдарында менің қорғауымдағы азамат пен жәбірленушіге қатысты интимдік сипаттағы мәліметтер, сондай-ақ жеке хат алмасулар бар. Сондықтан сот отырысын жабық өткізуді сұраймын», – деді адвокат Әсет Түбеков.

Судья өтінішті қанағаттандырып, журналистердің сот залынан шығуын сұрады. Марқұмның туыстары, керісінше, сот процесіне БАҚ өкілдерінің қатысуын қалаған.

Қаза тапқан әйелдің артында бес жасар баласы қалған. Туыстары экс-полицей өзінің қызметтік жағдайын пайдаланған болуы мүмкін деп есептейді және өтемақы талап етіп отыр.

Оқиғадан кейін Қарағанды қаласы мен облыстық Полиция департаментінің бірнеше қызметкері тәртіптік жауапкершілікке тартылып, қатаң сөгіс алған. Аудандық полиция бөлімінің басшысы қызметінен босатылған.

Экс-полицейге қатысты іс Қылмыстық кодекстің 370-бабы – құқық қорғау органы қызметкерінің ауыр зардаптарға әкеп соққан қызметтегі әрекетсіздігі бойынша қаралып жатыр. Бұл бап бойынша жеті жылға дейін бас бостандығынан айыру жазасы қарастырылған.

Марқұмның анасы сот жабық өткен жағдайда істің қалай қаралатынына алаңдайтынын жеткізді.