Петропавлда мектеп оқушысының сөмкесінен суық қару табылған

Желіде Петропавл қаласында бір оқушыдан тапанша табылғаны туралы ақпарат тарады, деп хабарлады MadeniPortal.kz.

Бұл туралы kursiv.media жазды. Солтүстік Қазақстан облысының білім басқармасы бұл — қаруға тек сыртқы түрі ғана ұқсайтын зат екенін түсіндірді. Қазір осы дерек бойынша сотқа дейінгі тергеп-тексеру жүргізіліп жатыр.

СҚО білім басқармасы оқиғаның Петропавл қаласындағы мектептердің бірінде болғанын айтты. Ведомствоның нақтылауынша, алаңдатқан сигналдың өзі оқушылардың ата-аналарынан түскен.

«Биылғы жылдың 5 ақпанында мектеп әкімшілігіне білім алушылардың ата-аналарынан жоғары сынып оқушысында тапаншаға сырттай ұқсас зат болуы мүмкін екендігі туралы ақпарат келіп түсті», — делінген хабарламада.

Осыдан кейін мектеп әкімшілігі шара қабылдап, қауіпсіздік бақылауын күшейтті.

«Білім беру ұйымының басшылығы жедел түрде әрекет етті: оқушы мамандандырылған күзет қызметінің қатысуымен мектеп әкімшілігіне шақырылды, заңды өкілдеріне және кәмелетке толмағандар ісі жөніндегі полиция инспекторына дереу хабар берілді», — деп қосты СҚО білім басқармасы.

Жағдайға полиция қызметкерлері де қосылды: олар ақпаратты тексеріп, күдікті затты тәркіледі де, тексеру жұмыстарын бастады.

«Тексеру барысында құқық қорғау органдары қызметкерлері затты алып қойды. Осы факті бойынша сотқа дейінгі тергеп-тексеру жүргізілуде. Оқиғаның мән-жайын құзырлы органдар анықтап жатыр», — деп түйіндеді ведомство.