Қ. Нұржанов атындағы жеңіл атлетика манежінде «Дала Қырандары» нормативтері қабылданды

К. Нұржанов атындағы жеңіл атлетика манежінде «Дала Қырандары» қоғамдық бірлестігіне үміткерлер арасында дене даярлығы нормативтерін қабылдау өтті, деп хабарлайды Мadeniportal.kz.

Сынаққа студенттерден бастап түрлі кәсіпорын қызметкерлеріне дейінгі ондаған қатысушы қатысып, өз күшін, төзімділігін және қозғалысқа дайындық деңгейін сынады.

Үміткерлер екі негізгі тапсырманы орындады: 3000 метрге жүгіру және Купер тесті. Купер тесті үш жаттығудан тұрды — секіру, қолды бүгіп-жазу және іш бұлшықеттеріне арналған «кітапша» жаттығуы. Әрбір қимыл жас және салмақ категориясына қарай бекітілген нормалар бойынша бағаланды. Нәтижелерді белсенді қырандардан құралған төрешілер алқасы жеке хаттамаларға тіркеді.

Сынақтар басталар алдында қатысушыларға нұсқаулық беріліп, қыздыру жаттығулары өткізілді. Манежде жарыстағы рухпен қатар, жылы да достық атмосфера орнады. Тәжірибелі қырандар жаңадан келгендерге қолдау көрсетіп, күшін дұрыс бөлуге көмектесті. Іс-шара барысында медицина қызметкерлері тұрақты кезекшілік етті.

Нормативтерді қабылдау — бұл тек дене дайындығын тексеру емес, болашақ қырандарды тәрбиелеу жүйесінің маңызды бөлігі. Мұнда қатысушылардың күші мен төзімділігі ғана емес, мінезі, тәртібі және өзін-өзі дамытуға деген ұмтылысы бағаланады.
Сынақ нәтижесі бойынша үздік көрсеткішке жеткен қатысушылар келесі кезеңге — ұйым жарғысы бойынша емтихан мен үйлестірушілермен сұхбатқа жіберіледі.