Басты бет > ЖАҢАЛЫҚТАР > ҚМДБ ораза кезінде бағаны шарықтатып жіберген дәмхана иелеріне үндеу жасады

ҚМДБ ораза кезінде бағаны шарықтатып жіберген дәмхана иелеріне үндеу жасады

Сурет ашық дереккөзден алынды

ЖАҢАЛЫҚТАР 12.03.2025

275

Қазақстан мұсылмандары діни басқармасы қасиетті Рамазан айында ауызашар өткізу әдебі туралы мәлімдеме жасады, деп хабарлады Мadeniportal.kz inform.kz-ке сілтеме жасап.

Басқарма өкілдерінің айтуынша, Рамазан — мұсылмандардың рухани тәрбиесін жетілдіріп, қарапайымдылық пен кішіпейілдікке үйрететін ай. Бұл айда жасалған әрбір ізгі іс сауабы еселеп жазылады, ал мұқтаждарға көмек көрсету үлкен сауапқа жетелейді.

"Аузы берік адамға ауызашар беру — сауапты іс. Бірақ, өкінішке қарай, соңғы кездері еліміздегі кейбір мейрамханалар мен дәмханалардың иелері ауызашар мәзірлерінің бағасын тым жоғары қойып, бұл халық арасында түсінбеушілік тудырып отыр. Асыл дініміз ауызашар дастарқанында ысырапшылдыққа жол бермеуді, бәсекелестікке түспеуді ұсынады. Мұндай әрекеттер сауапқа емес, күнәға апарады. Ауызашар дастарқаны қарапайым болуы керек. Құранда: «Ішіңдер, жеңдер, бірақ ысырапқа жол бермеңдер. Өйткені Алла ысырапқорларды жақсы көрмейді» деп айтылған («Ағраф» сүресі, 31-аят)", — деп атап өтті ҚМДБ баспасөз қызметі.

Қазақстан мұсылмандары діни басқармасы мейрамханалар мен тамақтану орындарының иелерін халыққа қолжетімді, қарапайым ауызашар мәзірін ұсынуға шақырады.

"Алла Тағала халқымызға екі дүние бақытын нәсіп етіп, қасиетті Рамазан айында жасаған ізгі амалдарымызға мол сауаптан жазғай. Әумин", - деп түйіндеді басқарма.

#ЖАҢАЛЫҚТАР

Бөлісу: