Үш адам жабылып ұрған: Таразда 30 жастағы медқызметкер көз жұмды

Таразда емханада жұмыс істеген 30 жастағы Думан ауыр соққыдан кейін есін жимастан қайтыс болды. Марқұмның туыстары оқиғаға қатысы бар барлық адамның жауапқа тартылуын талап етіп отыр, деп хабардады MadeniPortal.kz.

Марқұмның әпкесінің айтуынша, Думанға емделушілерінің бірінің бұрынғы күйеуі бірнеше рет қоңырау шалып, тіл тигізген. Кейін оны кездесуге шақырған. Туыстарының сөзінше, Думан кездесуге барған кезде оны үш ер адам күтіп тұрған.

Әпкесі ер адамдардың Думанды басынан ұрып, құлатқаннан кейін көліктің жүксалғышына салып әкеткенін айтады. Кейін оны Аса өзенінің жағасына апарып, соққыға жыққан деген болжам бар. Артынша ауыр жарақат алған ер адамды ауруханаға жеткізіп, «көшеден тауып алдық» деген көрінеді.

Думан есін жимастан көз жұмған. Оның артында жұбайы мен екі кішкентай қызы қалды.

Туыстары шабуылға қызғаныш себеп болуы мүмкін деп болжайды. Алайда олардың айтуынша, Думан мен емделуші әйелдің арасында ешқандай жеке қарым-қатынас болмаған.

Қылмыстық іс «Адам ұрлау» және «Абайсызда адам өліміне әкеп соққан денсаулыққа қасақана ауыр зиян келтіру» баптары бойынша тергеліп жатыр. Қазір бір күдікті қамауда. Полиция қылмысқа басқа адамдардың қатысы бар-жоғын тексеріп жатыр.

Тергеу Жамбыл облысы полициясы басшылығының ерекше бақылауына алынған.