Жалпақсайдағы трагедия: қауіпті иттер баланы ауыр жарақаттады

Алматы облысының Қарасай ауданына қарасты Жалпақсай ауылында шошынарлық оқиға болды. 30 маусым күні түстен кейін ауыл шетінде ойнап жүрген он жасар балаға бірнеше ит шабуыл жасаған. Қазір бала Қаскелең ауруханасында жансақтау бөлімінде жатыр, деп хабарлады MADENIPORTAL.KZ.

Оқиға ауыл жастары жиі жиналатын футбол алаңында болған. Куәгерлердің айтуынша, балалар ойнап жүрген сәтте, алаңға жақын орналасқан оңалту орталығының ауласынан үш ірі төбелескіш ит жыртық қоршау арқылы сыртқа шығып кеткен. Иттердің кенеттен балаға бас салып, ауыр жарақат салғанын көзімен көргендер бірден көмекке ұмтылыпты. Ауыл азаматтарының бірі шабуылдаған иттердің бірін пышақпен жаралап, баланы ажалдан арашалап қалған.

Куәгерлер бұл оқиғаның кездейсоқ еместігін алға тартады. Айтуларынша, иттердің орналасқан аумағы – корейлік оңалту орталығына тиесілі жер. Осы орталықта қауіпті тұқымдағы иттер заңсыз ұсталып келген деген күдік бар. Тұрғындар бұл мәселе туралы тиісті органдарға бірнеше рет ескерткенімен, еш нәтиже болмағанын алға тартуда.

Ең сорақысы, бұл орталықтың дәл іргесінде балабақша орналасқан. Тұрғындар балалардың қауіпсіздігіне алаңдаулы. Олар жергілікті биліктен нақты шара қабылдауды талап етіп отыр.

Оқиға бойынша Алматы облыстық полиция департаменті Қылмыстық кодекстің 345-бабы аясында іс қозғалғанын мәлімдеді. Қазір тергеу амалдары жүргізілуде. Сараптамалар тағайындалып, куәгерлерден жауап алынуда.

Жалпақсай жұрты бұл жағдайдың жай ғана оқыс оқиға ретінде жабылып қалмауын қалайды. Олар ауыл балаларының қауіпсіздігін қамтамасыз ететін нақты шешімдер қабылдануын талап етуде.